Royal Greenland
Suliffissuarni pisortat Polenimut angalasut
Royal Greenlandip suliffissuini tallimani pisortat paasisassarsiorlutik Polenimiipput, tassanilu Royal Greenlandip suliffissuani tunisassiornermi suliniutinik nutaanik saqqummiussiffigineqarput
Kalaallit Nunaanni Royal Greenlandip aalisakkanik suliffissuinut saarulliit tulaassukkat amerliartornerat Royal Greenlandip suliffissuinut, saarullinnik tunisassiortunut unallimmigassaqalersitsisimapput.
Kalaallit Nunaanni suliffissuit pisortaat tallimat tunisassiornermillu ingerlatsisut, unammilligassat tamakkua iliuuseqarfiginissaannut pikkorinnerulerniarlutik, Polenimilu Royal Greenlandip suliffissuani saarullinnik tunisassioriaatsimik takuniaallutik, Koszalinimi paasiniaaqatigiissimapput.
Ingerlatsivik nittartakkamini taamatut allappoq.
Atortut periutsillu
– Paasiniaaqatigiinneq pissarsiffigeqaara. Atortunik periutsinillu, saarullinnik tunisassiornitsinni atorsinnaasatsinnik, takutinneqarpugut suliffissuatsinni atulersinnaasatsinnik. Assersuutigalugu tunisassiornermi maskiinamik eqqusserusuppunga, isumaqarama taanna Paamiuni suliffissuarmi atorsinnaallutigu, Paamiuni suliffissuup pisortaa Ilannguaq Abrahamsen oqarpoq.
Polenimi paasiniaaqatigiinnermi suliffissuarni pisortat tunisassiornermillu ingerlatsisut ilaatigut saarulliit tisaneqarnerannik, qerisut qanoq aatsittarnerannik tunisassiallu immikkoortitertarnerannik takutinneqarput.
Tuniniaanermi periutsit
Polenimi paasiniaaqatigiinnerup kingorna Royal Greenlandimi suilsut Kalaallit Nunaanneersut Svendstrupimut ingerlapput, tassani ilaatigut tuninniaanermik periutsinik saarulliillu naleqassusaasa tulleriiaarnerannik takutinneqarlutik.
Royal Greenlandip Paamiuni, Maniitsumi, Sisimiuni Kangaatsiami Qasigiannguanilu suliffissuaatai saarullinnik tunisassiorput. Suliffissuarni taaneqartuni tamani pisortat tatmarmik Polenimi paasiniaaqatigiinnissamut qaaqquneqarsimapput.