suliffeqannginneq
Suliffissaaleqisut ikiarliartorput – nunaqarfinnilu amerliartorlutik
Naak Nunatsinni suliffissaaleqisut ikiliartoraluartut nunaqarfinni kisitsisit allaanerupput. Taakkunani suliffissaaleqisut ukiup siulianut sanilliullugu amerleriaateqarsimasut, Naatsorsueqqissaartarfiup kisitsisaata nutaat takutippaat
2017-imi juulimi suliffissarsiortutut nalunaarsukkat 2.249-nik amerlassuseqarput, taakkunannga 395-it nunaqarfinniillutik.
Ukiup siuliani qaammammut juulimut sanilliullugu suliffissarsiorlutik nalunaarsimasut 184-inik ikinnerupput. Illoqarfinni suliffissarsiortutut nalunaarsimasut 240-nik ikileriarput.
Tamanna Naatsorsueqqissaartarfiup kisitsisaataasa nutaat takutippaat.
Nunaqarfinni arnat
Piffissami nunaqarfinni suliffeqanngitsut amerleriarsimapput, ukioq kingulleq juulip qaammataani 339-niit ukioq manna piffissap taamaasinerani 395-inut.
Kisitsisit tassani takutippaat nunaqarfinni arnat suliffeqanngitsut amerlanerusut. Arnat nunaqarfinneersut 223-t suliffeqanngillat, angutillu nunaqarfinneersut sulifeqqanngitsut 172-llutik.
Suliffissarsiorlutik nalunaarsukkat saqqummersinneqartarput kommuninut suliffissarsiorsimasut tunngavigalugit. Qaammammi inuk ataaseq suliffissarsiortutut naatsorsugaasarpoq, qaammatip ingerlanerani ataasiarluni arlaleriarluniluunniit nalunaarsorneqarsimanera apeqqutaatinnagu. Suliffissarsiortutut nalunaarsukkat qaammatikkaartumik saqqummersinneqartarput.
Assip ataani tabellimi illit illoqarfigisanni nunaqarfigisanniluunniit pissutsit qanoq innersut takujuk