Siuariarneq
Suliffissaaleqineq suli annikilliartorpoq
Apriilimi suliffeqanngitsut 3.241-uupput. Taakku siorna piffissami tassani 720-nik ikinnerupput
Apriilip qaammataani 2016-imi inuit 3.241-t suliffissarsiortutut nalunaarsorneqarput, taakkunannga 460-t nunaqarfinnit. Tamanna siornamut piffissamut tassunga sanilliullugu katillugu inunnik 720-nik ikiliariarneruvoq.
Nunatsinni Naatsorsueqqissaartarfik taama ilisimatitsivoq.
Illoqarfinni suliffissarsiortut ikileriaataat 583-iupput.
Nunarput tamaat
Nunatsinni tamani suliffissaaleqineq annerusumik minnerusumilluunniit annikillivoq, Paamiut Tasiilarlu kisimik pinnatik, taakkunani ineriartorneq killormut nikippoq.
Ukiut naapertorlugu agguataarnerat qiviaraanni, angutit suliffissarsiortut amerlanerpaartaat 20 - 24-illu akornanni ukioqartut takuneqarsinnaavoq, taakku illoqarfimmi nunaqarfimmilu najugaqartunut atuuppoq-
Nuna tamakkerlugu arnat suliffissarsiortut 20 - 29-illu akornanni ukiullit amerlanerpaapput, nunaqarfinnilu 20 - 24-illu akornanni ukiullit amerlanerusut takussutissaqarpoq.
Atuaruk: Suliffissaaleqineq pillugu nutaarsiassaq nuannersoq takkuteqqippoq
Kommuninut saaffiginnittartut
Kommuninut suliffissaaleqinermik tunngaveqartumik suliffissarsiortutut nalunaarsukkat naatsorsornerat inuit qassiuneri qaammatikkaartumik saqqummersittagaavoq. Qaammammi inuk ataaseq suliffissarsiortutut naatsorsugaasarpoq, qaammatip ingerlanerani ataasiarluni arlaleriarluniluunniit nalunaarsorneqarsimanera apeqqutaatinnagu.