suliffissaaleqineq
Suliffissaaleqineq pillugu nutaarsiassaq nuannersoq takkuteqqippoq
Naatsorsueqqissaartarfiup kisitsisaataasa nutaat takutippaat januarimi suliffissaaleqisut siorna taamalineranut sanilliullugu ikileriarsimasut
Suliffissaaleqisut katillugit 4.402-t suliffissaaleqisutut januarimi nalunaarsorneqarsimapput, taakkunannga 737-t nunaqarfinni. Tamanna 2014-mi taamaalinerani nalunaarsukkanut 552-inik ikileriarneruvoq.
Naatsorsueqqissaartarfimmi kisitsisit nutaat saqqummiunneqartut tamanna takutippaat.
Atuaruk: Suliffissaaleqineq: Decembarimi suliffissaaleqisut ikilisut
Taamaalilluni qaammatit arfineq-marluk ingerlatiinnarlugit suliffissaaleqisut nalunaarsorneqartartut ikiliartornerannut nutaarsiassanik nuannersunik saqqummiussisoqarpoq, tassami decembari 2014-imi 2013-mi decembarimut sanilliullugu suliffissarsiortut ikinnerusimapput, soorlu aamma qaammatit siuliini taama inissittarsimasut.
Naatsorsueqqissaartarfimmit nalunaarutigineqartut naapertorlugit ukiuni tallimani kingullerni nalunaarsorneqartut naapertorlugit taamaallaat januar 2011-mi suliffissarsiortutut nalunaarsimasut 2015-imi nalunaarsorsimasunit ikinnerusimapput.
Kommunenut suliffissaaleqinermik tunngaveqartumik suliffissarsiortutut nalunaarsukkat naatsorsornerat inuit qassiuneri qaammatikkaartumik saqqummersittagaavoq. Qaammammi inuk ataaseq suliffissarsiortutut naatsorsugaasarpoq, qaammatip ingerlanerani ataasiarluni arlaleriarluniluunniit nalunaarsorneqarsimanera apeqqutaatinnagu.
Atuaruk: Suliffissaaleqisut: Nutaarsiassat pitsaasut qaammatini kingullerni tallimani
Illoqarfigisanni nunaqarfigisanniluunniit suliffissaaleqisut qanoq amerlatiginersut ataani takukkit