Suliffiit ulorianartut

Aalisartut, piniartut savaatillillu imminnut sulisumillu sulinermi ajoqusernissamut sillimmasernissaat soqutigisorujussuuvaat. Tamanna takuneqarsinnaavoq Kujataani paasisitsiniaanermi naammassineqaqqammersumi, tassani Sulinermi Ajoqusernernut Centeri nunatsinni sulinermi ajoqusernermut sillimmaseeriaaseq, Ataatsimut sillimmaserneq (Gruppeforsikring) paasisitsiniutigineqarsimalluni, tusagassiorfinnut nalunaarummi allassimavoq.

– Uannut akikinneruvoq imminut sulisummalu sillimmasernissaat. Sillimmateqanngikkuma uanga kisima akisussaaffik tigummissavara, tusagassiorfinnut nalunaarut naapertorlugu Themo Benjaminsen oqarpoq.

Savaatilik Andala Lund isumaqarpoq sulinermi ajoqusernermut sillimmateqarnera inunnit ilisimaneqalernissaa pisariaqartoq.

– Pitsaasuuvoq sulinermi ajoqusernermut sillimmasernissaq sammitinneqarnerulermat. Paasissutissat inunnut anngunnissaat pisariaqarpoq, Andala Lund oqaluttuarpoq.

Sulinermi Ajoqusernernut Centerimi pisortap Kristina Nordby-Rachlitz-ip namminermut sulisoqaraannilu sulisorisanik sillimmasiinissamik soqutiginninnerulerneq nuannaarutigaa.

– Aalisartut, piniartut savaatillillu taama amerlatigisut sulinermi ajoqusernermut sillimmasernissamik soqutiginninnerat pitsaasorujussuuvoq. Inuussutissarsiutaat Kalaallit Nunaanni inuussutissarsiutit ulorianarnersaattut taasariaqarput, taamaattumillu tamaviaarluta anguniagaraarput imminnut sillimmasernissaat, Kristina Nordby-Rachlitz oqarpoq.

Ataatsimut sillimmasernissaq aalisartunut, piniartunut savaatilinnullu piumassutsimik aalajangigassaavoq, sulisitsisulli inatsisitigut pisussaaffeqarput sulisuminnut sulinermi ajoqusernermut sillimmasiinissaminnut. Ataatsimut sillimmasiisarneq Kalaallit Nunaanni immikkut ittumik pilersinneqarsimavoq, taamaattumillu immikkut sammitinneqarluni nunatsinni pissutsinut, aalisartut, piniartut savaatillillu atugaannut.