Suliffeqarfinnut ikiorsiissutit ima isikkoqarput

Sulisartunut inuussutissarsiornerullu iluani ikiorsiissutit arlalinnut aggulussimasut, Sermitsiaq.AG-p paasivaa.

Aningaasaqarnermut ataatsimiititaliami amerlanerussuteqartut ikiorsiigasuarnissamut siunnersuummik sisamanngornermi saqqummiiffigineqarput, tamannalu amerlanerussuteqartunit, Partii Naleraq minillugu, akuersissutigineqarpoq. Ikiorsiigasuarnissaq, Aningaasaqarnermut Ataatsimiititaliamut saqqummiunneqartoq, qanoq imaqarnersoq Sermitsiaq.AG-p paasivaa.

Ikiorsiigasuarnissap siunertaraa sulisartut coronavirusip ajalusoortitsineranit eqqugaanissaminnik aarlerisut eqqissiallannissaat, suliffeqarfiillu ingerlatsinerminnut tunngavimminnut annaasaqarnissaminnut aarlerisut, soorlu takornarialerinerup iluani, ikiornissaat.

Immikkoortut sisamat

Ikiorsiissut sisamanut agguarneqarsimavoq, Danmarkimilu suliniutinut, danskit naalakkersuisuisa aalajagingaannut assigulluni.

  • Juunip qaammataata naanissaata tungaanut, namminersortut iluanni sulisut akissarsiaannut taartissatut 107 milliuunit koruunit illuartinneqarput.
  • Pinasuartumik ikiorsiissutissat 50 milliuunit koruuninik aningaasartaqartut neriniartarfinnut, akunnittarfinnut assigisaannullu immikkoortinneqarput. Tamanna atuutissaaq juunip naanissaata tungaanut.
  • Inuussutissarsiornerup iluani 100 milliuunit koruunit ikiorsiissutissatut immikkoortinneqarput. Aamma juunip naanissaata tungaanut.
  • Ilannngullugu aalajangerneqarpoq suliffeqarfiit akileraarutinut akitsuutinullu akiliinissaat kinguartinneqassasoq. Suliffeqarfiit tamarmik neqeroorut atussappassuk, aningaasat qaammammut 250 milliuunit koruunit pineqarput.
Powered by Labrador CMS