Suliffeqarfinnut akileraarutip affaannanngortinneqarnissaa 150 millioninik naleqassaaq

Aningaasaqarnermut naalakkersuisup Pele Brobergip (PN) suliffeqarfinnut akileraarutip 30 procentiusup affaannanngortinneqarnissaa AG-mut oqariartuutigereerpaa.

Kalaallit Nunaata nunat sanianiittut suliffeqarfinnut akileraarutaat appasipput, soorlu Canada 15 procentiuvoq, Island 30 procent kiisalu Savalimmiut 18 procent.

Suliffeqarfinnut akileraarutip affaannanngortinneqarnissaa anguneqassappat aningaasanik ujaasisoqaqqaartariaqarporli. Tamanna Peter Olsenip (IA) §37 naapertorlugu apeqquteqaataani akissummi takuneqarsinnaavoq.

Ingerlatseqatigiiffinnut akileraarut affaannanngortinneqassappat, tamanna pisortanut, Namminersorlutik Oqartussanut, kommuninullu ataatsimut isigalugit 130,5 million koruunit aammalu 187,5 million koruunit akornannik iluanaarutitigut annaasaqarfiussaaq, akissummi takuneqarsinnaavoq.

Suliffeqarfinnut akileraarutit amerlanerpaartai Namminersorlutik Oqartussanut tuttarput, sinneri kommuninut tuttarlutik.

Namminersorlutik Oqartussat suliffeqarfiutaannit iluanaarutit
Annaasaqaatilli taama amerlatiginissaat qularnarpoq. Tassami Namminersorlutik Oqartussat suliffeqarfiutaat suliffeqarfinnut akileraartarput.

- Iluanaarutit siuliani taaneqartut ilaat ingerlatseqatigiiffinnit Namminersorlutik Oqartussanit pigineqartuni pissarsiarineqartarmata, tamatumani ingerlatseqatigiiffinnut taakkungannga akileraarut Nunatta Karsianut taamaallaat tuttarluni, Pele Broberg akissummi allappoq.

Taamaattumillu iluanaarutitigut annaasaqartoqassagaluarpat ingerlatseqatigiiffiit Namminersorlutik Oqartussanit pigineqartut agguagarsiaqartitsinikkut akiliutaasa qaffannerisigut taakku tamakkiisumik ilaannakortumilluunniit taarserneqarnissaannut periarfissaqassaaq. Taamaasilluni annaasaqaataasussanut 150 million koruuninut matussusiisussanut ujaasisoqartariaqalissaaq.

Suli aalajangiusimaneqanngilaq
Suliffeqarfinnut akileraarutip affaannanngortinneqarnissaa Naalakkersuisunit anguniarneqartoq Pele Brobergip oqaatigaa, tamannali qaqagu apparneqassanersoq suli ilisimaneqanngilaq.

- Ingerlatseqatigiiffinnut akileraarutit allanngortinneqarnissaata ingerlanneqarnissaanni Aningaasaqarnermut Naalakkersuisutut siunnersuutinik saqqummiussinissaq akisussaaffigaara, Pele Broberg akissummi allappoq.

- Taamaattumillu siunnersuut taamaattup qanoq ilusilerneqarsinnaanera Aningaasaqarnermut Naalakkersuisoqarfik isumaliutigeqqullugu qinnutigaara. Taamatullu peqatigisaanik Naalakkersuisooqatigiinnissamut isumaqatigiissummi akileraarusersueriaatsip pisariillisarneqarnissaa pillugu immikkoortoq 152, aammalu kommunit akornanni naligiinnerulernissaq pillugu immikkoortoq 155 eqqumaffigineqarnissaat qinnutigalugu

- Siunnersuutaasinnaasut saqqummtiutinnginnerini isumaliutigisat inerneri Naalakkersuisut susassaqartullu alliat peqatigalugit oqaluuserineqaqqaartussaapput. Suliap taassuma ingerlanneqarnissaa erseqqinnerusumik aalajangersarneqanngilaq.