aallartisaaneq
Suliffeqarfimmik aallartitsisartut ikippallaarput
Suliffeqarfiit namminersortut arlaqarnerusut siunissami aningaasaqarnissamut aalajangiisuussapput. Tamatumanili politikkikkut naleqqussarnissaqinnuttaasunilu isiginnittaatsimik allannguinissaq pisariaqarput
Kalaallit amerlavallaat suliffeqarfimmik aallartitsinissamut taarsiullugu aningaasarsiortutut suliffeqarneq toqqissisimanartoq toqqartarpaat, tamannalu inuiaqatigiinni ajornartorsiutaavoq ilungersunartoq. Aningaasaqarnermut Siunnersuisoqatigiinni immikkut ilisimasallit aamma inuussutissarsiutinik ingerlatalinnut sinniisut taama isumaqarput. Aap, allaammi qinikkatut aqutsisut akornanni isiginnittaaseq siuariartorpoq:
Imminut napatittumik aningaasaqarnermik takorluugaq iluatsissappat inuiaqatigiit suliffeqarfinnik namminersortunik minnerunngitsumillu aallarnisaasunik arlaqarnerusunik, siuariartornermik suliffissanik akileraarutitigullu isertitanik pilersitsinissamik pingaartitsisunik, pisariaqartitsissapput.
Siuariartornissamut matuersaat
Ajornartorsiulli politikkikkut ukiuni kingullerni isiginiarneqarnerulersimagaluartoq suli annerusumik iliuuseqartoqartarpoq. Taama Sulisitsisut pisortaat, Brian Buus, isumaqarpoq.
- Suliffeqarfinnik nutaanik namminersortunik suliffeqarnerup iluani ineriartornermik siamasissutsimillu qulakkeerinnissinnaasunik amigaateqartorujussuuvugut. Tamanna aningaasaqarnikkut siuariartornissamut matuersaataavoq, taamalu oqartuni uagut kisiartaaqqajanngilagut, oqartoqarpoq.
Atuaruk: Aallartitsisut siuariartortitsissapput
Isiginnittaaseq kukkusoq
Brian Buusip taamaakkaluartoq annikikkaluamik pisoqarnera nuannaarutigaa - ataaninngaanniit suliffeqarfiit nutaaliortut aqqutigalugit politikkikkullu, inuussutissarsiutinilli siuarsaanermut aallarnisaanermullu isiginnittaaseq kukkusuusoq isumaqarluni.
- Inuussutissarsiutinik ineriartortitsinermut takorluukkat eqqartorneqartorujussuusarput, politikkili tigussaanerusoq eqqartorneqaleraangat, aningaasanik atuinissaq suli annerusumik pineqartarpoq, aningaasat suminngaanneernissaat pivallaarnagu. Inuussutissarsiorneq eqqumaffigineqarnerusariaqarpoq – politikkikkut innuttaasullu akornanni, Brian Buus oqarpoq.
Allaaserisaq tamaat AG-p aallarnisaaneq pillugu sammisaani atuaruk. Aviisi uani pisiarisinnaavat: