oqaatsinut politikki

Suliffeqarfimmi oqaatsinut politikki ersinngitsoq

Oqaatsinut politikki pingaaruteqartoq amerlasuut isumaqatigiissutigaat. Kisianni suliffeqarfinni tamanna takussaavallaanngitsoq, misissuinerup nutaap takutippaa

Kalaallit Nunaat oqaatsinut politikkeqarnera pingaartuusoq, misissuinermi peqataasut 60 procentii isumaqarput

Suliffeqarfinni amerlasuuni oqaatsinut politikki ersinngilaq. Ilaatigut amerlasuut kina akisussaasuunersoq ilisimanngilaat.

Tamanna spørgeskemamik misissuinerup, TNI-mi Niuernermik Ilinniarfimmi SK 1-mi Nuummi ilinniartut sisamat Sermitsiaq.AG aqqutigalugu suliarisimasaanni, noveberip 25-nit decemberip aappaat ilanngullugu ingerlanneqartup takutippaa.

Atuaruk: Oqaatsinut politikki misissuiffigigaat

Peqataasut 1.400-t
Inuit 1.400-t misissuinermut peqataapput, amerlanerusullu spørgeskema qallunaatut akisimavaat. Taamaattorli apersorneqartut affaasa kalaallisut pingaarnertut oqaaseqarnertik nalunaarutigaat, sinnerisalu annerusumik qallunaatut pingaarnertut oqaaseqarnertik nalunaarutigalugu.

Misissuinerup takutippaa, Nunarput oqaatsinut politikkeqartoq peqataasut 80 procentiisa missaasa misigaat. 62 procentillu tamatumani Kalaallit Nunaat politikkeqarnera pingaartuunerarlugu tapersiipput. Illuatungaanilli misissuinermi peqataasut pingajoraarterutaasa, oqaatsinut politikki ersarittuuneranik isumaqanngillat.

Kina akisussaava?
Affaat, tassa 56 procentit suliffeqarfitsik oqaatsinut politikkeqarnerarpaat, pingajoraarterutaasalu peqannginnerarpaat, sinnerisalu ilisimannginnerarlugu.

Apersorneqartut affaasa suliffigisami oqaatsinut politikkimut malinninnerannik angerput, naaggaartut aamma naluaramik akissuteqartut tamarmik 25 procentiupput.

Aammalu 30 procentii oqaatsinut akisussaasoqarneranik angerput, 40 procentiilu naaggaarlutik, 30 procentillu nalunerarpaat.

Pisortani sulisut amerlasuut
Misissuinermi peqataasut amerlanerpaartaat, 90 procentit sinneqartut suliffeqarput. Taakkulu 60 procentiisa missingi pisortat suliffeqarfiutaanni sulisuupput, 30 procentillu namminersortumi suliffeqarput. Sinnerilut peqatigiiffimmi imaluunniit 'allami' suliffeqarnerarput.¨

Kalaallisut ussassaarineq ajortut
Misissuinermi peqataasut affaasa, pisiniarfiit kalaallisut ussassaarisarnersut naaggaarput, pingajoraarterutaallu killormoortuanik akipput, sinnerisalu ilisimannginnerarpaat.

Powered by Labrador CMS