misissueqqissaarneq
Suliffeqarfiit akissarsiatigut tatisimaneqartut
Sulisunik piukkunnartunik amigaateqarnerup akissarsiatigut annerusumik suliffeqarfiit tatisimaneqarnerulertut, Nuummi suliffeqarfiit tallimanit amerlanerusunik sulisulinnit inuussutissarsiornikkut misissueqqissaarnerup takutippaa.
Nuummi piviusumik suliffissaaleqisoqanngitsoq, taamaattumillu suliffeqarfiit Europamut saattarput. Kisianni Europami siuariarnerup Kalaallit Nunaanni suliffeqalernissamut annertunerusumik soqutiginninneq killeqartippaa, inuussutissarsiornikkut misissueqqissaarnerup Sermersooq Business Councilimit saqqummiuteqqammerneqartumi naqissuserneqarpoq.
Tatisimaneqarneq
Tamatuma malitsigisaanik suliffeqarfiit akornanni sulisussaqarniarluni pilerisaariniarlunilu aningaasarsiatigut tatisimaneqarneq misigineqartarpoq.
- Suliffeqarfiit namminersortut ilaannikkut suliffeqarfinnut kommuninit pigineqartunut aamma Namminersorlutik Oqartussanit pigineqartunut, ajunngitsorsiassanik, suliffeqarfiit namminersortut akuttunngitsumik neqeroorutigisinnaasaannit allaanerusunik, neqerooruteqartartunut, unammillerniarnerat ajornakusoortarpoq, kisianni pisortani sullivinnit sulisussat pillugit unammillertoqavittarnera misigineqartanngilaq, nalunaarusiami tamanna atuarneqarsinnaavoq.
- Atorfinitsitsinermi sulisussanik tikisitanik sulisussarsinissamit, najukkameersuni sulisussani, atorfinissinnaanissamut piginnaanngorsarneqartariaqanngitsuni aningaasaliiumassuseqartoqarpoq. Ataatsimut isigalugu najukkameersunik sulisussarsisinnaanissamut ilinniartitsisinnaanissamullu piumassuseqarneq naleqqussarumassuseqarnerlu annertuujusoq misigineqartarpoq, tamanna atuarneqarsinnaavoq.
Suliffeqarfiit avataaneersunik sullissisunik, soorlu siunnersortinik pingaartumik Danmarkimiit, saniatigullu Nuummi pissarsiarineqarsinnaasunik, atuillutik pisinnaasaqarnertik aamma piginnaasaqarfinnik pisariaqartitsinertik iluarsisarpaat.
Kinguaariit nutaat
Kinguaariinnut tulliuttunut ilinniakkaminnik naammassilertunut sammisoqarpoq.
Ilinniarfeqarfiit nammineq malitassanik pitsaassutsinik ineriartortitsinnginnissaat suliffeqarfiit neriuutigaat, kisianni nunani tamalaani pitsaassutit akuerineqartunik malitaqarnissaq innersuussutigaat, suliffeqarfiit misissuinermi peqataasut taama innersuussuteqarput.