suliffissaaleqineq
Suliffeqanngitsut ikinnerusut
Kisitsisit nutaat takutippaat, arnat suliffeqanngitsut nalunaarsorsimaffiannit ersigunnaariartortut
Nunatsinni suliffissaaleqisut suli ikiliartorput. Naatsorsueqqissaartarfiup kisitsisaataasa nutaat tamanna takutippaat.
Tassa kisitsisit takutippaat, piffissami kvartalit sisamaanni 2014-imit kvartalit pingajuannut 2015-imut suliffissarsiortut ukiup siulianut sanilliullugu ikinnerulaartut.
Angutit qaammatini suliffissarsiorfiusimasuni nalunaarsuutit allannguuteqarpallaanngillat, arnanulli qaammatini qulit aqqaneq-marlullu akornanni suliffissarsiortutut nalunaarsorsimasut agguaqatigiissinnerat annikinnerusimavoq.
Atuaruk: Illoqarfinni pingasuni suliffissaaleqisut ikileriartut
Katillugu inuit 8.911-t qaammammi ataatsimi imaluunniit arlaqartuni piffissami suliffissarsiortut nalunaarsorneqarsimapput kvartalit sisamaannit 2014-imit kvartalit pingajuannut 2015-imut ukiumi siuliani 9.533-iullutik.
Piffissami kvartalit sisamanni 2014-imit kvartalit pingajuannut 2015-imut 45,3 procentit, katillugit 4.038-t qaammammi ataatsimi qaammatillu pingasut tungaanut suliffeqanngitsutut nalunaarsorneqarsimapput, kiisalu 12,9 procentit, tassa 1.148-t qaammatit qulit aqqaneq-marlullu akornanni suliffeqanngitsutut nalunaarsugaallutik.
Ukiut assigiinngitsut
Piffissami kvartalit sisamanni 2014-imit kvartalit pingajuannut 2015-imut inuit 18-24 akornanni ukiullit katillugit 148-t qaammammi ataatsimi qaammatillu pingasut tungaanut suliffeqanngitsutut nalunaarsorneqarsimapput. Suliffissarsiortunit procentinngorlugu 6,7-iullutik.
Inuit 45-59 akornanni ukiullit 489-it qaammatit qulit aqqaneq-marlullu akornanni suliffeqanngitsutut nalunaarsugaapput, tamannalu procentinngorlugu 18,0-iuvoq.
Tabelit takussutissiat assip ataani takukkit