isorliunerusut
Suliatigut peqatigiiffik nutserinermut siunnersuut pillugu: Ilinniarluarsimasunik amigaateqartoqassaaq
Namminersorlutik Oqatussani, universitetimi aamma nunatsinni katersugaasivinni sulisut, Naalakkersuisut atorfiit Nuummit nuukkusussagunikkit mianersussasut isumaqarput
Dansk Magisterforening, ilaatigut Namminersorlutik Oqartussani, katersugaasivinni, universitetimi aamma Ilinniarfissuarmi 170-inik ilaasortaqartup, maanna borgmesterit pingasut atorfiit 600-t nuunneqarnissaannik siunnersuutaat oqaaseqarfigaat.
Siunnersuut piviusunngortinneqassappat, siulittaasoq Camilla Gregersen sulisut pillugit siullermik ernmumassuteqarpoq.
Ilaquttanut periarfissat
- Ilaqutariinnut nuunnissaq pilerinartuussappat, aappariinnut suliffissanik periarfissaqassaaq, tamannalu Kalaallit Nunaanni ajornarsinnaavoq, uteqqiannissamut kajuminnanngimmat, siulittaasoq Camilla Gregerse, Sermitsiaq.AG-mut oqarpoq.
Universitetillu qimallugit atorfiit ilinniarluarsimasunik pilerisutsitsinissaminnut ajornakusoortitsinerussasut taanna isumaqarpoq.
Sulisussat unammissutigineqartut
- Danmarki Kalaallit Nunaannit amerlanerusunik universitetilinnik illoqarfeqarpoq, taamaammallu ilinniarluarsimasunik sulisunik illoqarfiit pingaarnersaannit pissarsinissaq tunngavissaqarpoq, tamannalu Kalaallit Nunaanni minnerusumik periarfissaavoq. Atorfiillu nutaat aamma ilinniarluarsimasunik sulisoqarnermut kommuninut unammillertaalissapput, tamannalu Nuup avataani amigaataareerpoq.
Dansk Magisterforening Kalaallit Nunaanni ASG-imik suleqateqarpoq, taakkulu aamma borgmesterit oqallissaarutaannut isornartorsiueqqammerput.
Atuaruk: Kattuffiit: Atorfiit 600-t Nuummit nuunneqarnissaat piviusorpalaanngilaq
Atorfiit ilaat nuunneqarsinnaasut ilaallu nuunneqarsinnaanngitsut maani oqallisaangaatsiarpoq. Ilinniarluarsimasut atorfiit tamaasa Nuummit nuunneqannginnissaat ilissi oqariartuutigaasiuk?
Nalunaarfigalugit
- Atorfiit nuussorneqarnissaannut Dansk Magisterforeningimi akerliunngilagut, kisianni ilaasortagut nooqataassagunik aporfigisinnaasaat kalerriutigaagut. Danmarkimi atorfiit nuussorneqarnerannit ernumanermik aamma qularnermik pilersitsisartut ilisimavarput. Taamaattumik neriuutigaarput, Namminersorlutik Oqartussat nuussuinerit paasissutissiinermik tunngaveqarluartumik pissaagaat, Camilla Gregersen, Sermitsiaq.AG-mut oqarpoq.