Suliamik ingerlatitseqqittoqarnera pissutaalluni kiffartuussinissamut isumaqatigiissut kinguartinneqarpoq

Exelis Servicesip kiffartuussinissamik isumaqatigiissuteqarnera naaliniarlugu Kalaallit Nunaat aamma Danmarki suleqatigiittut Martin Lidegaardip, Radikale Venstremeersup ilisimatitsissutigaa.

- Uagut, Vittus Qujaukitsoq uangalu, isumaqatiginninniarpugut. USA-mik isumaqatiginninniaqqinnissat aamma suleqatigiiffigineqassapput. Suliamik ingerlatitsisoqaqqinnera pissutaalluni suliarput kinguaattoorsinnaavoq, Martin Lidegaard Sermitsiaq.AG-mut oqarpoq.

Greenland Contractorsip USA-mi suliarinnittuussisarfiup aalajangigaa ingerlateqqillugu marlunngormat nalunaaruteqarpoq.

Isumaqatigiissutip naalineqarnissaa
Exelis Services A/S Pituffimmi kiffartuussinissamut isumaqatigiissuteqarnera USA-mit unitsiinnarneqarusunngilaq. Taamaattumik Kalaallit Nunaat aamma Danmark suleqatigiillutik isumaqatigiissut naalitinniarsaraat. Isumaqatigiissut ukiuni arfineq marlunni atuuttussaagaluaq ukiumi ataasiinnarmi atuutiinnartunngornissaa sulissutigineqarpoq, nunanut allanut ministeri matoqqasumik isumasiorneqareernermi kingorna oqarpoq.

- Toqqaannartunik akissutissaqanngilanga, kisianni suliassarpassuaqarpugut sapaatit akunnerini tulliuttumi - immaqalu aamma qaammatini. USA isumaqatiginninniaqataarusunngilaq suliamik ingerlatitseqqittoqareernerata kingorna, Martin Lidegaard oqarpoq.

Isumaqatigiissut sivikillineqassappat nutaanik suliarinnittuussinissat aallartinneqassapput. Danmarkip USA-llu isumaqatigiissutigisareerpaat kiffartuussinissamik isumaqatigiissuteqarfigineqartoq kalaallit danskilluunniit suliffeqarfiat isumaqatigiissuteqarfigineqassasoq.

- USA-p Pituffimmiinnerminut akiliuteqartalernissaa Siumumit siunnersuutigineqartoq qanoq oqaaseqarfigisinnaaviuk?

- USA-mit tamanna siornatigut itigartinneqartareerpoq, kisianni Kalaallit Nunaannit neriuutigineqartut tusarnaassavagut, Lidegaard oqarpoq.

Suliaq ilinniutaasariaqartoq
Matoqqasumik isumasiuineq pingasunngornermi ingerlanneqartoq Doris Jakobsenip Siumumeersup naammagisimaartinngilaa.

- Suliami amerlasuunik suliaqarpugut. Danmarkip Kalaallit Nunaatalu suliaq ilinniutigisariaqarpaat. Suleqatigiinnerusariaqarpugut, Doris Jakobsen oqarpoq.

- Exelis Servicesip sumit aallaaveqarneranut tunngatillugu nunanut allanut ministeriaqarfiup ikiuisimannginnera naammaginanngilluinnarpoq. Danskit naalakkersuisui kukkussuteqarput, taamaattumik arlaatigut kinguneqartitsisoqartariaqarpoq, Siumut tunuliaqutaralugu folketingimi ilaasorta Sermitsiaq.AG-mut oqarpoq.

Kalaallit Nunaat pillugu ataatsimiititaliami siulittaasuusoq IA-mit Johan Lund Olsen aamma akatsivoq.

- Isumasiortitsinerup matoqqasuunera pissutaalluni oqaatigineqartut toqqaannarlugit oqaatigisinnaanngilakka. Isumasiuinermili apeqqutit arlaqartut akineqarnissaat siunnertarineqarmat pakatsivunga paasissutissanik nutaanik peqanngimmat. Taamaattumik ministerimut marlunnik apeqquteqaateqarpunga.

- Inuussutissarsiornermut aqutsisoqarfiup nunanut allanut ministereqarfimmit ilanngutsinneqarsimaneranut attuumassuteqarput. Tassanimi suliffeqarfinnik toqqaanermi aamma suliami tassani aalajangiisooqataapput, oqarpoq.