Suleqatit imigassarsunnippa?

Atuarfeqarfiit, meeqqeriveqarfiit, napparsimaveqarfiit kommunillu allaffeqarfii taakkuupput suliffeqarfinni sulisuminnik nakkutilliisussamik toqqaasussat. Sulisullu toqqarneqartup suleqatini imigassamik atuisuuneri eqqummaariffigissavai.

Atornerluineq pillugu Inatsisartut inatsisissaattut 2017-p upernaani ataatsimeersuarnemi oqaluuserisassatut siunnersuutigineqarpoq.

- Atornerluinermi inuit pingaarutillit oqaatsit nutaajupput. Atornerluinermi inuit pingaarutillit tassaapput suliffimminni atornerluinermut katsorsartinnermik ilitsersuisuusut aamma katsorsartinnissamut kajungilersitsisuusut, inatsisissatut siunnersuutigineqartup tusarniaassutiginerani oqaaseqaammi ilaatigut allassimavoq.

Atuaruk: Naartusut pinngitsaalillugit aalakoornaveersaartinneqartalissapput

Inuit pingaaruteqartunik taasat katsorsaanermik suliaqartut suliffeqarfinni ikiortaatut inissisimassapput. Taakkulu inuit imerpallaat ikiaroornartumillu atuivallaartut katsorsarneqarnissaannik ikiorneqassasut isumannaarneqarnissaa suliarisassavaat

- Eqqarsaatigineqartoq tassaavoq atornerluinermi inuit pingaaruteqartut maluginiaassasut, kajumissaarissasut aamma katsorsaanermut innersuussisuussallutik, paasissutissiissummi allassimavoq.

Imertarneq ajornartorsiutaavoq

Inatsisissatut siunnersuut imigassamut atornerluisunut suliniutit ilagaat; Kalaallit Nunaanni imigassamut tunngasuni 2013 – 2019-imi iliuusissanut pilersaarusiaq. Suliniummi imigassat imerneqartartut annertussusaat pineqanngilaq, imigassamilli atueriaaseq pineqarluni.

- Sapaatit akunnerata qaammatilluunniit ataatsip ingerlanerani ingerlaavartumik imertoqarneq ajorpoq, sapaatilli akunnerisa naanerini akissarsiallu tunniunneqarfiini assorujussuaq ernguttoqartarluni Taamaalilluni “binge drinking” aamma aalakuulipallanniarluni aalakoorniaannarluniluunniit imerujussuarnermik taaneqartartoq pisarpoq, iliuusissanut pilersaarummi allassimavoq.

Pinermi ataatsimi sisamat qaangerlugit aalakoorniaannarluni imernermik isigineqarpoq.

Pinermi ataatsimi tallimat amerlavallaarput

Tassa suleqatit immiartorfimmut sisamat sinnerlugit viinnisortut immiaarartortulluunniit atornerluinermi inuit pingaaruteqartut nakkutigissavaat.

Inatsillu akuerineqassapput nakkutilliineq annertussaaq.

- Kissaatigineqarpoq piffissaq ungasinnerusoq eqqarsaatigalugu atornerluinermi inuit pingaaruteqartut nuna tamakkerlugu pigineqalernissaat, paasissutissiissummi allassimavoq, Atornerluinermi inuit pingaaruteqartut tassaasinnaapput atuarfinni sulisut, meeqqat ornittagaanni allani, peqqinnissaqarfimmi, kommunit ingerlatsiviini aamma namminersortuni sulisut.

Kalaallit Nunaanni naatsorsueqqissaartarfiup kisitsisaatai malillugit kalaallit imernikinneruleraluartut 2015-mi viinnimik, immiaaqqanik imigassamillu akuitsumik pilersuineq inuit 14-it sinnerlugit ukiullit eqqarsaatigalugit inummut ataatsimut naatsorsuullugu imigassaq akuitsoq 8,3 liiteri imerneqarsivoq. Danmarkimi imigassamik pilersuneq annertugaluartoq imertariaaseq allaaneruvoq.

- Danmarkimut sanilliullugu Kalaallit Nunaanni inuit imigassartunngilluinnartut amerlanerupput, taamalu atuineq inunnut ikinnerusunut agguataarsimalluni, suliniummut pilersaarummi aarlerisaarussutigineqarpoq.

Islandimi inuit 15-t sinnerlugit ukiullit liiterit arfinillit ataallugit imerneqarsimasut Eurostatip kisitsisaatigaa.

Atornerluinermi inuit pingaarutillit toqqarneqarpata naatsorsuutigineqartorujussuunissaat ilimanarpoq.

- Atornerluinermi inuit pingaarutillit suliaat pingaaruteqartorujussuusinnaavoq atornerluinermut siusissukkut iliuuseqarnermut atatillugu, paasissutissiissummi allassimavoq.

Inuit pingaarutillit sulilinnginerminni pikkorissartinneqassapput.

- Sulilinnginnerminni ilinniarsimasuussapput Allorfimmit neqeroorutigineqartumik, aamma sulisitsisuannik isumaqatigiissuteqartoqassaaq.

Atornerluisuunermut katsorsaaviit kommunini tamani

- Siornatigut inatsisissatut siunnersuusiortoqarsimanngilaq Kalaallit Nunaanni atornerluinermik katsorsaanermik malittarisassiuussisumik. Inatsisissatut siunnersuut taamaattumik imaqarpoq nutaatut katsorsartinnissamut innersuunneqarnermut maleruaqqusanik, katsorsartinnissamut neqeroorutinik, katsorsartinnissamut neqeroorutit aaqqissuussaanerat aamma atornerluinermut ilisimasanut qitiusoqarfimmik, Allorfik, paasissutissiissumik aallaqqaasiummmi allassimavoq.

Atornerluinermut ilisimasanut qitiusoqarfimmik nuna tamakkerlugu iliusissamik suliniummi aasaq manna atuutsinneqalersumik pilersitsisoqareernikuuvoq. Sulisunillu atorfinitsitsisoqareerluni atornerluisuunermut katsorsaavinnik pilersitsisoqataasussanik. Taakku Allorfik-nnik kommunini tamani ukiuni pingasuni tulliuttuni pilersitsissallutik.