Suleqatigiissitaliap isertuussap nipangersimanini kipitippaa

Ukiaru Inatsisartut isummerfigissavaat uranimut akuersaannginneq atorunnaarsinneqassanersoq. Suleqatigiissitaliap atorfilinnik politikerinillu inuttallip isumannaatsuunermut, ulapungaarsimanermut il.il. akisussaassutsit agguataarniarpai

Kalaallit-qallunaat suleqatigiissitaliaanni, uranimik piiaanermi kinguneqaatissanik samminnittup, ilaasortai kikkuunersut isertuunneqarpoq.

Politikkikkut qaffasissumik suliarineqassaaq Inatsisartut ukiaru isummerfigilerpassuk Kalaallit Nunaata uranimut akuersaannginnera atorunnaarsinneqassanersoq. Tamanna aporfissaqanngitsuunngilaq
Taamaattumik kalaallinik-qallunaanik ilaasortalimmik suleqatigiissitaliortoqarsimavoq, taassumalu nalunaarusiaq, Nunarput uranimut akuersaalissappat kinguneqaatissanik qulaajaasoq, ulapputigaa.
Taamatut ullumi allappoq Berlingske, Nunatta uranimut isertuussinera pillugu allaaserisamini.
Suleqatigiissitaliamut suliassiissut aammalu suleqatigiissitaliami ilaasortat 20-30-t kikkuuneri isertuunneqarput. Suleqatigiissitaliamilu qanoq pisoqarnera arlaannaataluunniit oqaatigiumanngilaa.
Berlingske-lli suleqatigiissitaliami ilaasortat ilaat nassaarisimavai, minstereqarfiit arlallit sinniisui aammalu Nunatsinni Naalakkersuisoqarfiit sinniisui.
Tamakkua tamarmik oqaaseqarnissaminnut mianersortorujussuupput, atorfillit ilaata oqarneratut pissutigalugu tamanna »politikkersorfiusorujussuummat - Kalaallit Nunaanni Danmarkimilu aammalu naalagaaffeqatigiit immikkoortuini«.
»Suliassaq mianernartuuvoq«, atorfilik alla oqarpoq. »Tamatigummi urani pineqartillugu taamaattarpoq. Inuit kissaammersinneqartarput«, atorfillit pingajuat oqarpoq.
Aamma atuaruk: Urani nunani tamalaani aaqqiagiinngisitsilersinnaavoq
Nipangersimapput
IA-p maajimi naalakkersuisunit Siumukkunnit suleqatigiissitaliaq pillugu paasissutissat ujartorpai, mannali tikillugu akissuteqarfigineqarsimanani. Folketingimut Inatsisartunullu ilaasortap Sara Olsvigip, IA-meersup, eqqumiigaa assersuutigalugu suleqatigiissitaliami kalaallit ilaasortat kikkuunerannik imaluunniit suleqatigiissitaliap inerniliineranik Naalakkersuisut tamanut saqqummiussissamaarnerannik paasissutissinneqarsinnaannginnami.
Sammisamut "uranimut politikki"-mut iseriarnissamut oqaaseqaatit saniatigut aamma peqqutaavoq Danmarkip Kalaallillu Nunaata akornanni akisussaaffiup agguataarnissaa. Kuannersuarni piiaaffimmik ingerlatsinermut atatillugu kiap isumannaatsuuneq upalungaarsimanerlu akilissavai.
Illit qanoq isumaqarpit? Uranimut akuersaannginnerup atorunnaarsinnera Danmarkimut attaveqarnermut ajoqutaassava? Uranimik piiaanermut atatillugu isumannaallisaaneq Danmarkip akilissavaa? Imaluunniit tamanna aatsitassarsioqatigiiffiup akilissavaa?

Powered by Labrador CMS