arsaanneq

Suleqatigiinnissamik isumaqatigiissutikkut nunatsinni arsaanneq siuarsarneqassaaq

Dansk Boldspil Unionip, DBU-p, nunatsinnilu arsaattartut kattuffiata GBU-p, suleqatigiinnissamik isumaqatigiissummi sinaakkutassat aalajangersarpaat

Kunstgæsbane i Nuuk

Dansk Boldspil-Unionip, DBU-p, nunatsinnilu arsaattartut kattuffiata, GBU-p, ulluni makkunani suleqatigiinnissamik isumaqatigiissutissamut ´Kalaallit arsaannermik siuarsarnissaat´, sinaakkutassat ulluni makkunani aalajangersarpaat, tassuuna siunertarineqarluni GBU-p FIFA-mut UEFA-mullu ilaasortanngortinneqarnissaa.

Taamatut DBU nittartakkamini allappoq.

– Siunertaq piviusunngortinneqassaaq suliniutitigut arlalitsigut kalaallillu arsaattartuinut aningaasaliinertigut, tassa Kalaallit Nunaanni tamarmi ivigaasanik arsaattarfinnik tamakkiisumik angissusilinnik arsaattarfissuarnillu pilersitsinikkut. Aammalu peqqissutsimut, ileqqorissaarnermut atuarfimmilu arsaannerup ingerlanneqarneratigut Kalaallit Nunaanni amerlanerusut arsaattalersinniarneqassapput, illua’tungeriit nalunaaruteqarput.

GM-finalit isiginnaarpai

DBU-p siulittaasua Jesper Møller nunatsinni arsaalluni pissartanngorniulluni finalertoqarnerani Qasigiannguaniissimavoq, tassanilu GBU-p siulittaasuanik John Thorsenimik aammalu kultureqarnermut ilinniartitaanermullu naalakkersuisumik Nivi Olsenimik suliniut tamanna oqaloqatigiissutigaa.

– Arsaanneq peqqinnermut ataqatigiinnermullu pitsaasuuvoq, taamaasillunilu nunatsinni tamarmi ineriartorneq nukittorsarsinnaallugu, ilinniartitaanermt naalakkersuisoq Nivi Olsen DBU-mutd oqarpoq.

FIFA-mut ilaasortanngorniarput

GBU-p siulittaasuata John Thorsenip DBU-mik isumaqatigiissuteqarnissaq nuannaarutigaa:

– FIFA-mut UEFA-mullu ilaasortanngornissarput kissaatigeqaarput, nunatsinnili arsaanneq suli aallarnisarfimminiippoq, taamaattumillu isumaqatigiissutissaq pingaaruteqarpoq.

Suliiut tamanna ukiumut 1,5 million koruuninik aningaasaliiffigineqarallarsimavoq, DBU-llu siulittaasuata Jesper Møllerip naatsorsuutigaa qallunaat kalaallillu soqutigisallit aningaasaleeqataasinnaassasut.

Powered by Labrador CMS