Suleqatigiilluarnerup imminut toquttarneq unitsissavaa
Inuit imminut toqunnissamik eqqarsartut maanna oqartussani allanut innersuunneqaqattaartarunnaassapput
Imminut toquttarnermut, imminut toqoriartarnermut aamma imminut toqunnissamik sioorasaarisarnermut atatillugu Namminersorlutik Oqartussat ataqatigiittumik iliuuseqarnissamik pilersitsiniarlutik suliaqarput. Tillie Martinussenip §37 naapertorlugu apeqquteqaataanut akissummi tamanna atuarneqarneqarsinnaavoq.
- Peqqissutsimut Ilisimatusarnermullu Naalakkersuisoqarfiup massakkut imminut toquttoqarsimatillugu, imminut toqoriarsimasoqartillugu imminullu toqunnissamik sioorasaarisoqarsimatillugu iliuuserineqartartussat nuna tamakkerlugu atuutilersinniarpai. Tamatumani kommuni, politiit peqqinnissaqarfillu suleqatigiipput, akissummi tamanna atuarneqarsinnaavoq.
- Innuttaasut allanut innersuunneqaqattaannginniassammata ullumikkornillu pilertornerusumik ikiorneqarniassammata iliuuserineqartussanut tunngatillugu ataqatigiissakkamik suliniartoqarnissaa pisariaqarpoq.
Tasiilami pinartunut upalungaarsimasoqanngitsoq
Assigiinngitsuni sulisut innuttaasunik imminut toqunnissamik eqqarsaateqartunik oqaloqateqarnissamut ilinniartinneqassapput, taamaalillutik pineqartup sioorasaarinermini qanoq iliuuseqarnissaanut navianartorsiornermik naliliillaqqinnerulerniassammata.
Tasiilami imminut toquttoqartarnera pillugu pisunut Tillie Martinussen apeqquteqarpoq. Tassani imminut toquttoqartillugu imaluunniit toqoriartoqartillugu pinartunut upalungaarsimasoqanngitsoq, tassani akissummi atuarneqarsinnaavoq. Taamaattorli imminut toqoriartoqartillugu aamma sioorasaarisoqartillugu nuna tamakkerlugu malittarisassiortoqarpoq. Tassanilu atuarneqarsinnaavoq, nakorsaq naliliisassasoq.
- Napparsimasup sioorasaarutiminik eqquutitsinissaata ernumassutiginissaanut tunngavissaqartoq nalilerneqarpat napparsimasoq napparsimmavimmut unitsinneqassaaq, malittarisassani atuarneqarsinnaavoq.
Sioorasaarineq qamuuna sakkortuumik aalassannikkut oqaatigineqartoq nalilerneqarpat napparsimasullu taamaaliorniarnani erseqqissumik oqaatigippagu napparsimasoq sapaatip-akunnerani tulliuttumi malittarinnilluni oqaloqateqarnissamik isumaqatigiissuteqarnikkut angerlartinneqarsinnaavoq.
Tasiilami suliniut
Tasiilami suliniummik 2016-imi aallartitsisoqarpoq, tassani suliniutit katersorneqassapput.
- Tamatuma saniatigut 2016-imi Naalakkersuisut suliniummik aallartitsipput, tamatumani Tasiilaq immikkut ukkatarineqarluni, tassunga ilagitillugu Tasiilami suliniutit ingerlareersut ataqatigiissarnissaat qulaajarnissaallu, akissummi tamanna allaqqavoq.
- Suliniut aqutsisoqatigiit ataannut inissinneqarpoq, tassanilu Kommuneqarfik Sermersooq aamma ilinniartitaanermut, peqqissutsimut isumaginninnermullu naalakkersuisoqarfiit ilaasortaatitaqarput. Massakkut suliniutip Kommuneqarfik Sermersuumut tunniunnissaa sulissutigineqarpoq.