Sukkaniukkiaq aalakooqaluni aallarniaraluartoq

Avannaata Qimussersuani arfininngormat sukkaniuttoqarmat ataaseq peqataaqquneqanngilaq. Aaqqissuisut naliliipput sukkaniunnersuarmi peqataanissaminut aalakoorpallaartoq.

Atuaruk: Assit: Aajuna Avannaata Qimussersuanngortoq

Avannaata Qimussersuani aallartussat allassimaffianni aqqit 36-it allassimagaluarput, angusanili takuneqarsinnaavoq aallartut ataatsimik amigartut.

Kinguneqartinneqassava?
- Nalilerneqarsimavoq sukkaniuteqataanissaminut aalakoorpallaartoq. Avannaata Qimussersuata ukiuni 26-ni pisarnerani aatsaat taama pisoqarpoq. Taamaammat assorsuaq pakatsissutigaara taama pisoqarsinnaammat, Kalaallit Nunaanni Qimussertartut Kattuffiannit KNQK-mi siulittaasoq Mikkel Jeremiassen Sermitsiaq.AG-mut oqarpoq.

Peqataasunut imigassartorsimasunut Avannaata Qimussersuani malittarisassaqanngilaq.

- Taamaakkaluartoq timersortartorpalaartumik pissusilersornissamut aalajangersakkanik unioqqutitsineruvoq. Aamma pineqartup peqatigiiffia nalunaarfigaarput taama pisoqarnera akuersaarsinnaanngikkipput. Maanna peqatigiiffiup taassuma isummerfigisussanngorpaa una pisimasoq arlaannik kinguneqartinneqassanersoq, Mikkel Jeremiassen.

Avannaata Qimussersua pillugu allaaserisat atuakkit