Isumalioqatigiisitaq
Sukap isumalioqatigiissitami akerleriinneq aaqqiissuteqarfigaa
Tunngaviusumik inatsisissaq pillugu isumalioqatigiissitami Atassut ilaasortaatitaaruppoq, IA-lu Inatsisartuni ilaasortamik Ane Hansenip borgmesteritut sulilernini pillugu sulinngiffeqalersimasup paarlatsigisinnaasaanik nassaarniassaaq.
Tamanna Tunngaviusumik inatsissaq pillugu isumalioqatigiissitap akerliiffiusumut, novembarip qaammataaniilli suliaqarsimanngitsumut, aaqqiissutaavoq
Taarsiisoqassanngitsoq
Suka K. Frederiksenip tusagassiuutinut nalunaarummi paasissutissiaraa, Mala Høy Kúko-p Atassummiik Siumumut nuunnerata kingunerisaanik Atassutip isumalioqatigiissitami ilaasortaatitaqarunnaarnera, qinersisoqartinnaguli taanna allamit taarserneqarnavianngitsoq. Tamatumunnga pissutaavoq Atassutip Inatsisartuni ilaasortaatitaarussimanera.
- Tunngaviusumik Inatsisissaq pillugu Isumalioqatigiissitap katitigaanerata aaqqiivigineqarnera iluarisimaarpara, tamanna suliakkiissutinut najoqqutassiamut taamalu inatsisartut Naalakkersuisunut Isumalioqatigiissitap pilersinneqarneranut tunngaviliineranut naapertuuppoq taamaasilluni isumalioqatigiissitami sulineq nangittumik ingerlaqqissinnaalissaaq, innersuussutigalugu Isumalioqatigiissitami siulittaasup tulliatalu tusagassiutinut nalunaarutaanni “suleriaqqissinnaanissamut piareersimanertik” oqariartuutigimmassuk. Taamaammat qilanaarpunga Isumalioqatigiissitap sulinera nangittumik malinnaaviginissaanut sulilluarnissaanillu kissaallugit, Suka K. Frederiksen oqarpoq.
Peqataasartut
Tunngaviusumik inatsisissaq pillugu isumalioqatigiissitami suliaqarnermi inuit marluk sisamallu akornanni peqataasartussanik toqqaasoqarsinnaanera, ilanngullugu paasissutissiarineqarpoq.
Naalakkersuisullu aalajangerpaat kommuneqarfiit neqeroorfigineqassasut periarfissinneqassasullu borgmesteri Isumalioqatigiissitami aalajangeeqataanani peqataasartussatut toqqarneqarsinnaasoq, tusagassiuutinut nalunaarummi paasissutissiarineqarpoq.