Thursday, July 13, 2017 - 15:57

Suka: Nunaqavissut Pituffimmut isersinnaapput

Assi.: Nasa
Avanersuarmiut eqqaanilu innuttaasut Pituffimmi orsernissaminnut periarfissaqareerput. Nunanut allanut naalakkersuisoq KNAPK-mut akissuteqarnermini allappoq.

Avarnersuarmi piniartut Pituffimmut tikinnissaminnut periarfissaqareerput.

Nunanut allanut tunngasunut naalakkersuisoq, Suka K. Frederiksen (S) KNAPK-mi siulittaasumut Henrik Sandgreen akissuteqarluni naqissusiivoq.

Henrik Sandgreenip sumiiffimmi piniartut Pituffik akunniffittut periarfissarilissagaat, Suka K. Frederiksenimut ammasumik allagaqarnermini piumasaraa, taamatullu aamma orserlutillu pisiniarfiliarsinnaanissaat.

Kisianni akunninnissamut nalunaarut 2010-meersoq malillugu periarfissaareerpoq, Suka K. Frederiksen akissummini allappoq.

- Nalunaarut malillugu inuit, inuit allattorsimaffianni Kalaallit Nunaata avannaani allorniusaq avannamut sanimukaartumi 75 graderimi, allorniusarlu tukimukaartoq 63 graderip iluanni angerlarsimaffeqarunik, sakkutooqarfimmut isersinnaatitaapput, aallarlutillu aamma aqqusaarsinnaatitaallutik, akissummi allaqqavoq.

Orsussaq naammattoq pigineqarpat aamma orsernissamut periarfissaqarpoq.

- Qallunaat illersornissamut forbindelsesofficeri nalunaarutigaa Pituffimmi sakkutooqarfimmi ingerlariaaseq malillugu, nunaqartut umiatsiaminnik orsiinissamut periarfissaqarmata sakkutooqarfimmi orsussaq (benzin) naammattoq pigineqarpat. Orsiisarfik US Air Forcemit pigineqaranilu aqunneqanngilaq, piginneqatigiiffimmilli sakkutooqarfimmik aserfallatsaaliillunilu aqutsisumik pigineqarluni. Piginneqatigiiffiup sullissinermini orsussamik tuniniaanermini nalilersuisarpoq orsussamik peqqumaatigisaq naammattoq pigineqarnersoq naliliinermilu tamanna aallaavigisarlugu, Suka K. Frederiksen allappoq.

Aammattaaq pisiniarfimmut danskit ingerlatseqatigiiffiannit ingerlanneqartumut pisiniarnissamut periarfissaqarput.

Tamanna tunngavigalugu ukiorpassuarnilu isumaqatigiissutit atuuttut malillugit, innuttaasut piniartullu piffinni pineqartuni, KNAPK-mi ilaasortat ilanngullugit, Pituffimmut aqqusaarsinnaatitaapput. Tamanna Nunanut Allanut Ministeriaqarfimmit uppernarsarneqarpoq, Suka K. Frederiksen allappoq.

Seneste nyheder / Nutaarsiassat kingulliit