ministerit naapinnerat

Suka K. Frederiksenip Europa-Kommisæri ataatsimeeqatigaa

Nunanut allanut naalakkersuisoq, Suka K. Frederiksen (S), Nunat Imarpiup akianiittunik Nunasiaataasi-masunilu ministeriisa ukiumoortumik Bruxellemi ataatsimeersuarnerannut peqataavoq

Suka og Neven Mimica
Naalakkersuisoq for udenrigsanliggender Suka K. Frederiksen sammen med Europa-Kommissær, Neven Mimica

Namminiilivinnermut, Nunanut Allanut Nunalerinermullu Naalakkersuisoq Suka K. Frederiksenip Nunat Imarpiup akianiittunik Nunasiaataasimasunillu (OLT) ministeriisa ukiumoortumik ataatsimeersuarneranni Bruxellesimi peqataavoq. Namminersorlutik Oqartussat tusagassiuutinut nalunaarummi ilisimatitsipput.

Ministerit ataatsimeersuarnerat OLT-eermiut iluanni aaliangiisartut qaffasinnerpaartaraat. Ataatsimeersuarnermi ukiumi aggersumi politikkikkut pingaarnersiukkat ingerlanneqartussat aalajangiiffiginissaat siunertaraat.

Politikkikkut nalunaarut atsiorneqartoq
- Tassunga atatillugu Naalakkersuisup OLT-milu ministerit peqataasut allat Politikkikkut Nalunaarummut atsiorput ”Allaffissornikkullu Aalajangersakkat” akuersissutigineqarlutik, Namminersorlutik Oqartussat allapput.

Politikkikkut Isumaqatigiissummi ilaatigut aalajangiunneqarpoq EU-p piffissami aggersumi aningaasatigut missingersuutit 2021-mit atuutilertussat pillugit isumaqatigiinniarnissaanni OLT-eermiut soqutigisaat illersorneqassasut, taamatullu EU-p Tuluit Nunaatalu Brexit pillugu isumaqatigiinniarneranni isumaqatigiissutigineqartussani iluaqutaasinnaasunik OLT-eermiut ilanngunneqarsinnaanersut periarfissat misissorneqassapput.

Nalunaarummi taaneqartumi saniatigut immikkoortoqarpoq EU-p nunallu EU-p avataaniittut killeqanngitsumik niueqatigiissinnaanermut isumaqatigiissutaannut OLT-it ilanngunneqarsinnaanersut periarfissat misissorneqarnissaat.

Europa-Kommissærip ataatsimeeqatiginera
Ministerit ataatsimeersuarnerat iluatsillugu Naalakkersuisup Europa-Kommissær, Neven Mimica Kommissionimi nunat tamaalaat akornanni suleqatigiinnermik ineriartortitsinermullu akisussaasuusoq ataatsimeeqatigaa.

- Ataatsimiinnermi suleqatigiinnermut isumaqatigiissutaasoq eqqartorneqarpoq, suleqatigiinnermullu tassunga Naalakkersuisoq naammagisimaarinnilluni oqariartuuteqarpoq. Maannamullu pingaartumik missingersuutinut 2021-mit siumullu atuuttussat isumaqatigiinniutigineqarnissaat sioqqullugu suleqatigiinnermik isumaqatigiissutip attatiinnarneqarnissaa oqariartuutigalugu. Kommissærip erseqqissaatigaa suleqatigiinnissamut isumaqatigiissummik naammagisimaarinninneq illuatungeriilluni piusoq, Europa-Kommissionimiillu tamatuma attatiinnarneqarnissaa Kalaallit Nunaatalu soqutigisaasa ingerlanneqarnissaat aningaasanut missingersuusiornissami aggersumi suliniutigineqarnissaat oqaatigalugu, Namminersorlutik Oqartussat ilisimatitsipput.

Powered by Labrador CMS