Pituffik
Suka K. Frederiksenip Amerikami nunanut allanut ministeri ataatsimeeqatigisimavaa
Nunanut Allanut Naalakkersuisup Issittumi siunnersuisoqatigiit ataatsimeersuarneranni Rex Tillerson oqaloqatiginissaanut periarfissaqarfigisimavaa. Tillerson Nunatsinnukassangunarpoq.
Amerikami nunanut allanut ministeria, Rex Tillersoni naapisimaarnerani Nunanut Allanut Naalakkersuisup, Suka K. Frederiksenip (S) Kalaallit Nunaata pingaartitai eqqartornissaanut periarfissinneqarpoq.
Ataatsimiinnermi danskit nunanut allanut misnisteriat Anders Samuelsen (LA) peqataavoq, Suka K. Frederiksenillu nunap toqqavia pillugu apeqqut oqallisigisaasa ilagaat. Thule Air Base aammalu illersornissamulu isumaqatigiissut eqqartukkanut ilaasimapput.
Tusagassiuutinulli nalunaarut aallaavigalugu taanna erseqqissaavoq, USA-p Nunatsinni suliaqartarneri Nunatsinnut innuttasunullu erseqqissunik iluaqutaanissaat.
- Ataatsimiinneq ingerlalluarpoq Rex Tillersonillu suliassaq pimoorullugu tiguvaa, taamatuttaarlu Nunatsinnut pulaarnissaanut qaaqquussutiga tigulluarlugu, Suka K. Frederiksen tusagassiuutinut nalunaarummi allappoq.