Suka K. Frederiksen ministerinik Bruxellesimi ataatsimeeqateqarpoq

Namminiilivinnermut, Nunanut Allanut Nunalerinermullu Naalakkersuisoq Suka K. Frederiksen Nunat Imarpiup akianiittunik Nunasiaataasimasunillu (OLT) sapaatip akunnerata naanerani ukiumoortumik oqallinneranni OLT-illu Naalakkersuisunut ataatsimiinnissaannut peqataajartorluni Bruxellesimiippoq. Oqalliffiup uuma siunertaraa illuatungeriit ataavartumik oqaloqatigiittarnerisa pilersinnissaat, taamatullu OLT-eermiut EU-mik suleqateqarnermi pisinnaatitaaffii periarfissaallu nukittorsarnissaat.

OLT-EU-mi ataatsimiinnissat sioqqullugit Naalakkersuisup EU-mi suliaqarfinnit NATO-miillu aallartitanik suliaqarfinnut attuumassutilinnik ataatsimeeqateqarpoq. Ataasinngorneq Sukap Danmarkip NATO-mi aallartitaa Michael Zilmer-Johns aammalu nunat avannarliit Norge, Finland Islandillu NATO-mi aallartitaat ataatsimeeqatigai. Ataatsimiinnerup siunertarai Kalaallit Nunaanni maanna pisut, NATO-mut apeqqutit julimilu NATO-p pisortati-goortumik ataatsimeersuartitsinissaata illuatungeriilluni ilisimatitseqatigiittarnerup oqilisarneqarnissaat.

- Taakku saniatigut Naalakkersuisup EU-p Nunanut Allanut suliaqarnermi Vice-Generalsekretæria Christian Leffler, EU-p Issittoq pillugu politikkimi atorfilittat suliaqarnerinut akisussaanerpaasoq ataatsimeeqatigaa. Ataatsimiinnermi Kalaallit Nunaata EU-llu Issittoq pillugu soqutigisaat eqqartorneqarput, taamatullu EU-p piffissami aggersumi EU-mi aningaasanut inatsisissaq (MFF) Issittoq pillugu isumaqatigiinniarnissaa upernaaq manna ingerlanneqartussaq. Tassunga atatillugu Suka K. Frederiksenip ilannguppaa Kalaallit Nunaata EU-mik suleqateqarnera pillugu sulinerup pitsaasup ingerlateqqinnissaa soqutigisarigaa – ajornanngippallu suleqatigiissutigineqartut amerlisarnissaat soqutigigitsik. Tamanna Lefferip paasivaa, suleqatigiinnerullu ingerlatiinnarnissaa illuatungaanit aamma soqutigineqartoq oqaatigalugu, Namminersorlutik Oqartussat ilisimatitsivoq.

EU-p Issittumi Politikkimut atatillugu 2017-mi Arctic Stakeholders Forum pilersinneqarpoq, tassanilu siunertaavoq EU-p Issittumi nunat sumiiffinniittut ilanngussivigisinnaasaannik aningaasalersuinissamut pingaarnersiuinissaa pillugu nalunaarusiornissaaq. Kalaallit Nunaanni Namminersorlutik Oqartussanit aallartitat inuussutissarsiornermillu ingerlatsisut nalunaarusiamut tassunga isumassanik tunniussaqarput, nalunaarusiarlu ukiup aallartinnerani naammassineqartussaavoq. Siunertaavoq nalunaarusiami suliniutissatut aningaasalersuinissamullu pingaarnersiukkat taakkartorneqartut MFF-imik isumaqatigiinniarnissami eqqarsaatigineqartussat akornannut ilanngunneqassasut.

Brexitimi killiffik ajornakusoortoq aamma eqqartorneqarpoq, tassanilu Kalaallit Nunaata aalisakkanik nioqqutissianik UK-mut pingaarutilimmik niueqateqarnera eqqartorneqarluni. Brexitittaaq Nunat Imarpiup akianiittunik Nunasiaataasimasunillu kattuffiata OCTA (Overseas Countries and Territories Association) ilaasortaasa amerlassusaata allanngornissaa nassatareratarsinnaavaa, qeqertammi najugaqarfigineqartut 22-nit 13-inut appariassammata.