isumalioqatigiissitaq

Suka aamma Kruse: Immitsinnut assortunngilagut

Naalakkersuisut marluk, Suka K. Frederiksen aamma Karl Kristian Kruse, imminnut assortoratik tamanut nalunaaruteqartariaqartutut misigisimapput.

Suka K. Frederiksenip Tunngaviusumik inatsisissamik isumalioqatigiissitap sulineranut atatillugu aaqqiissuteqarpoq, tassani Karl Kristian Kruse Sermitsiaq.AG-mut kukkulluni paasissutissiisimammat.

Ataatsimut tusagassiuutinut nalunaaruteqarnerminni sooq isumaqatigiinnerlutit nassuiarpaat, kisianni Karl Kristian Krusep Sermitsiaq.AG-mut erseqqissaasuteqarneranut atatillugu kukkusunik paasissutissiineranut utoqqatsissuteqanngillat.

Kukkusumik erseqqissaassuteqartoq
Sukap napparsimalluni sulinngiffeqarnerani Kruse erseqqissaassummi nassiussamini ima allappoq:

”Naalakkersuisut piginnaatitsinerat Tunngaviusumik Inatsisissaq Pillugu Isumalioqatigiissitap suleriarnissaanut nukittorsaataassaaq, taamaalillunilu qulakkeerneqarluni Isumalioqatigiissitap Inatsisissatut siunnersuummut atatillugu missingiutitut suliassani 2018-mi naammassisassani pitsaasumik naammassiniarumaaraa.''

Taamatut oqaasertaliisoqarnerani isumalioqatigiissitap sulinera aappaagu ukiup naanerani naammassineqarnissaanut tunngasoq Sermitsiaq.AG-p nutaarsiassaq allaaseraa. Tamanna isumalioqatigiissitap suliassaasa siornatigut naliliiffigineqarnerani siusinnerujussuuvoq.

Maanna suilap ukiup ataatsip affaatalu ingerlanerinnaani naammassineqarsinnaanngormat soorunami maluginiarneqarpoq, tamannalu - sunaaffa - ilumuunngitsoq, Suka K. Frederiksenillu tamanna KNR-imut nassuiaassuteqarfigisariaqarsimavaa.

Karl Kristian Kruse ataatsimut tusagassiuutinut nalunaaruteqarnermi ima nassuiaavoq:

- Tassa imatut paasineqassaaq Isumalioqatigiissitamut aningaasaliissutigineqartut ukioq 2017-2018-lu ilanngullugu Naalaakkersuisunit Inatsisartunillu akuerineqarsimavoq. Pisariaqassappalli najoqqutassiaq tunngavigalugu periarfissaqarpoq Isumalioqatigiissitap sulinera sivitsorneqarnissaa. Arlaatigulluunniit Isumalioqatigiissitap sulinerata sivitsorneqarnissaa matussusinngilara, Karl Kristian Kruse taama oqaasertaliivoq.

Kukkusumik oqaasertaliineq
Erseqqissaassutigineqartumi oqaasertaliussaq ''taamaalillunilu qulakkeerneqarluni Isumalioqatigiissitap Inatsisissatut siunnersuummut atatillugu missingiutitut suliassani 2018-mi naammassisassani pitsaasumik naammassiniarumaaraa'' sukaterinerullunilu kukkusumik oqaasertalerneqarsimasoq oqaatigineqanngilaq.

Suka K. Frederiksen maanna napparsimalluni sulinngiffeqarnerminit uterpoq, Tunngaviusumik Inatsisissamut Isumalioqatigiissitamut akisussaaffik tigoqqippaa, taannalu suliassaq pingaartittorujussuuaa. Tunngaviusumillu inatsisissamik sulineq piffissamik pisariaqartinneqartumik ingerlanneqarnissaa, Krusep oqarneratut piffissaliussamik killilersuinani pissasoq oqaatigissallugu taassuma pingaartippaa.

Powered by Labrador CMS