suliffissaaleqineq
Suilffeqanngitsut sulilernissaannut SIK-p pinngitsaaliumanngilai
Naalakkersuisunut ilaasortaq Karl-Kristian Kruse ilisimaatsuliorpoq suliffeqanngitsut aalisakkanik suliffissuarni sulinissaannik pinngitsaaliniaramigit, sulisartut kattuffiat SIK isumaqarpoq
Suliassaqartitsinermut iluameersumik politikkeqanngilaq.
Taamatut sulisartut kattuffiat SIK taamatut akissuteqarpoq, aalisarnermut Naalakkersuisoq Karl-Kristian Kruse, Siumut, qanittukkut oqarmat aalisakkanik suliffissuarni sulisussaaleqineq qaangerniarlugu, suliffeqanngitsut aalisakkanik suilffissuarni pinngitsaalillugit sulilersinniarlugit.
Suliffeqanngitsut suliumanngippata pisortanit ikiorsiissutinik tunineqartarunnaassapput.
– Sulisussaaleqinermut sulisartut pisuutinneqarnerat ingasappallaaqaaq. Nalunngilarput sumiiffiit ilaanni unammilligassaqartoq, kommunillu tamakkua aaqqinnissaannut pikkorinnerulertariaqarput. Aamma tamanna oqaloqatigiissutigaarput. Inuilli aalisakkanik suliffissuarmi sulinissaannik pinngitsaalineqarsinnaanngillat, ataasiakkaat atugarisaat paaseqqaartinnagu. Uannit tusaallugu allaanngilaq kukkusumik naliliinertut assersuutissatullu pitsaanngitsutut, ministerip sulisartoqarnermut pimoorussamik politikkeqarneraninngarnit, JEss G. Berthelsen tusagassiorfinnut nalunaarutikkut allappoq.
Krusep kikkut sinnerlugit taama oqarpa?
Tamatuma saniatigut sulisartut kattuffiata apeqquserpaa Karl-Kristian Kruse Naalakkersuisut sinnerlugit oqalunnersoq, taamaatumillu naalakkersuisoq tamatumunnga akisussaasoq Vittus Qujaukitrsoq akissuteqaqquvaa apeqqummut tamatumunnga Naalakkersuisut qanoq isumaqarnersut.