qinersineq
Suiaaqatiminoortartut oqaluffimmi katittalernissaannut akerliusoq
Partii Naleraq sinnerlugu Inatsisartunut qinigassanngortittup Mads Peter Grønvoldip akuerisinnaanngilaa suiaaqatiminoortartut oqaluffimmi katittalernissaat meeravissiartaartalernissaalluunniit
Atassutip Inuusuttai sinnerlugit Inatsisartunut qinigassanngortittoq, ajoqi Kajpeter Heinrich, isumaqarpoq suiaqatiminoortartut meeravissiartaartalernissaannut piffissanngortoq. Aamma taassuma suiaaqatiminoortartut oqaluffimmi katittalernissaat tapersersorpaa.
Kisiani Mads Peter Grønvoldip, Partii Naleraq sinnerlugu Inatsisartunut qinigassanngortittup, akuerisinnaanngilluinnarpaa suiaaqatiminoortartut oqaluffimmi katitinneqartalissappata meeravissiartaartalissappataluunniit. Isumaqarpormi taamaaliornissaq biibilimut naapertuutinngitsoq.
- Biibilimi allassimavoq Mosesimik allakkat pingajuat kap. 18 vers 22:’ Anguteqatit arnatut ilillugu innaatissanngilat innaassineq taamaattoq maajunnartorsuummat’, Mads Peter Grønvold oqarpoq nangillunilu:
- Aamma Paulusip Romamiunut allagaani kap. 1 vers 27 ilaatigut ima imaqarpoq: ‘Angutit kannguttaallutik anguteqatiminnik atoqateqartarput taamalu tammarnerminnut naleqquttumik pillaatisiaqalerlutik’.
Atuaruk: Atassutip qineqqusaartitaa: Anguteqatiminoortartut meeravissiartaartalerlik
Biibili kristumiut malittariaqarpaat
Nunatsinni ilageeqarnermut inatsit suiaqatigiit oqaluffimmi katissinnaalernerannik kinguneqartussamik allanngortinneqartussanngorlugu Inatsisartuni ukiaanerani eqqartorneqartussaangaluarpoq, oqaluuserineqarnissaali maanna nutaanik Inatsisartoqalernissaanut kinguartinneqarluni.
- Kristumiutut inuunitsinni malitassarput tassa Biibili, uagut Inatsisartunut qineqqusaartugut aamma Inatsisartuni ilaasortat Biibilimi allassimasut allanngortitersinnaanngikkigut isumaqarpunga, Mads Peter Grønvold oqarpoq.
Atuaruk: Suiaqatigiit oqaluffimmi katissinnaanngungajalerput