Savalimmiut
Suiaaqatigiit katissinnaalerput
Savalimmiuni suiaaqatigiit pisortanut katissinnaalernissaannik inatsisissatut siunnersuut tallimanngormat Lagtingip akuersissutigaa
Taamaasilluni savalimmiuni politikkip oqaluttuarisaanerani ulloq 29. april 2016 pingaarutilinngorpoq. Ukiut 29-t matuma siornatigut siullermeersumik siunnersuutigineqarpoq suiaaqatigiit innuttaasut sinnerisulli pisinnaatitaaffeqalissasut.
Aappassaaneerneqarnera assigalugu marlunngormat pingajussaaneerneqarnerani 19-it akuersillutik taasipput 14-illu akerliullutik taasillutik. Partiit naalakkersuisoqatigiinneersut tamarmik, kiisalu atttaviitsoq Sonja Jógvansdóttir, Sambandspartiet-imeersullu marluk Edmund Joensen aamma Magni Laksáfoss, akuersillutik taasipput.
Innuttaasut taasitinneqarnissaat amerlanerussuteqartut itigartippaat
Naggataajusumik oqaluuserineqarnerani illua'tungiliuttut siunnersuut unitseriaraluarpaat.
Ilaasortat sisamat, Kaj Leo Johannesenip, Sambandspartiet, Jenis av Ranap, Midterpartiet, Kári Højgaardip, Selvstyrepartiet, aamma Jógvan á Lakjunip, Folkeflokken, allannguutissatut siunnersuutigaat suiaaqatigiit katissinnaalernissaat innuttaasunut taasissutigitinneqassasoq. Siunnersuut amerlanerussuteqartunit itigartinneqaerpoq.
Tamanna naalagaaffimmi inatsimmik allannguineruvoq, tassa tamanna savalimmiut qallunaallu oqartussaaffigimmassuk. Taamaattumik siunnersuut Folketingimi oqaluuserineqassaaq, nalinginnaasumillu siunnersuutit taamaattut akuersissutigineqartarput.
Siunnersuulli aatsaat atuutilissaaq paragraffi allanngortinneqareerpat, taamaasilluni suiaaqatigiit oqaluffimmi katitinneqarnissaannut ilagiit pisussaaffeqassanatik.