tusagassiorfiit
STTK ataannarumavoq
TV-qarfiit radioqarfiillu nutaamik peqatigiiffiliulersaarnerat maanna peqatigiiffiusup STTKp uniinnarfigerusunngilaa
STTK-mi ilaasortat isumaqatigiissutigaat peqatigiiffitsik ingerlaannassasoq naak Nuuk TV aamma Arctic TV Ilulissaneersoq nutaamik peqatigiiffiliulersaaraluartut. Tamanna isumaqatigiissutigineqarpoq STTK-mi ilaasortat ataasinngornermi unnukkut ataatsimiinneranni.
Atuaruk: TV-qarfiit peqatigiiffiliulerput
Nuuk TVp aamma Arctic TVp peqatigiiffitsik STTK saqqumilaanngippallaarnerarlugu isornartorsiorpaat. Taamaammat pilersitsilluni ataatsimeersuarnissamut aggustip 29-at aggersaapput. Tamannali sioqqullugu STTK ingerlariaqqinniarluni iliuuseqarpoq ataasinngornermilu unnukkut ilaasortanik ataatsimiisitsilluni.
- Isumaqatigiissutigaarput kattuffik nukittorsarneqassasoq. Taamaammat isumaqatigiissutigaarput piffissami qaninnermi immikkut ittumik ataatsimeersuartoqassasoq, STTK-mi siulittaasoq Knud Fleischer nalunaarpoq.
STTK isornartorsiorneqarpoq naatsorsuutinik kukkunersiukkanik ukiuni marluni saqqummiussisimannginnerarlugu. Kisianni ukioq allortarlugu ataatsimeersuartarnissaq ukiut arlallit matuma siorna aalajangiunneqarsimasoq, Knud Fleischer erseqqissaavoq.
Annerusumik oqaaseqartinniarlugu Knud Fleischer Sermitsiaq.AG-mit maanna pissarsiariniarneqarpoq.