Steen Lynge: Periarfissat misissorpai

Kangerlussuarmi Napparsimmaveeqqami inissaaleqineq pissutigalugu napparsimasunut aqqusaartunut qasuersaartarfimmik pilersitsisoqarsinnaanngilaq. Taamatut allappoq peqqissutsimut attaveqarnermullu Naalakkersuisoq Steen Lynge, Atassut, Inatsisartunut ilaasortamut Doris Jakobsenimut, Siumut, paragraf 37 naapertorlugu apeqqutaanut akissummini. Doris Jakobsen aamma folketingimut ilaasortaavoq taamaattumillu Kalaallit Nunaata Danmarkillu akornanni angalakulasarpoq, angalasarnerminilu Kangerlussuarmi napparsimasunik naapitsikulasarsimavoq, isumaqarporlu tamakkua qasuersaartarfeqartariaqartut.
Steen Lyngeli neriorsuivoq,napparsimasut Kangerlussuarmut aqqusaartartut pillugit Peqqissutsimut Attaveqarnermullu Naalakkersuisoqarfiup Peqqissutsimut Aqutsisoqarfik Mittarfeqarfiillu attaveqarfigissagai, napparsimasut pitsaanerusumik atugaqarnissaat periarfissarsiorniarlugu.
Steen Lynge nalinginnaasumik isumaqarpoq peqqinnissaqarfimmi sulisut, killilinnik atugassaqaraliuarlutik, sumi tamani napparsimasunik pitsaanerpaamik sullissiniartartut.
– Sumiiffimmi peqqinnissaqarfik napparsimasut angalasut aqqusaarnissaannik tamatigut nalunaarfigineqartarput, taanna erseqqissaavoq.
Steen Lynge isumaqarpoq inuit, Kangerlussuarmi Napparsimmaveeqqamut saaffiginnitut, sulisut piginnaasaqarluarlutik suliaminnillu ilisimasaqarluarlutik ikiorniartaraat.s
– Napparsimasut nalasut tikinnerminnit aallaqqinnissaminnut tamatigut Napparsimmaveeqqami uninngatinneqartarput, Steen Lynge tikkuaavoq, nangillunilu oqarluni napparsimasut aqqusaartut allat tamatigut Napparsimmaveeqqamut saaffiginnittarsinnaasut.
– Napparsimasut peqqiilliorlutik misigisimagunik tiguneqartarput Napparsimmaveeqqallu nakkutilliisarfiani qasuersaartinneqartarlutik, apeqqutissaqarpatalu tamakku akiniarneqartarput, Steen Lynge allappoq, paasissutissiivorlu kinguartoortoqaraangat napparsimasut tamarmik nerisassanut allagartamik tunineqartartut.