assartuinermi akit

Steen Lyngep kukkusimanerarpoq

Naalakkersuisunut ilaasortaq Steen Lynge nassuerpoq Inatsisartuni ilaasortanut kukkusumik paasissutissiisimalluni

Peqqissutsimut attaveqarnermullu naalakkersuisup Steen Lyngep Atassummeersup nassuerutigaa kukkusumik paasissutissiisimalluni

Kalaallit Nunaanni Brugsenimi Pisiffimmilu pisortaanerit sisamanngornermi nalunaarput attaveqarnermut naalakkersuisoq Steen Lynge Atassummeersoq kukkusumik paasissutissiisimasoq. Tamannalu ilumoortoq Steen Lynge maanna nalunaarpoq. Taanna tallimanngornermi ualikkut ilisimatitsivoq paasissutissanik kukkusunik saqqummiussisimalluni.

Atuaruk: Brugsen aamma Pisiffik: Steen Lynge eqqunngitsumik paasissutissiivoq

Pisoq aallartippoq Atassut sinnerlugu Inatsisartuni ilaasortat Knud Kristiansen aamma Gerhardt Petersen paragraf 37 naapertorlugu apeqquteqarmata assartuinermi akit qaffalernersut paasiniarlugu. Steen Lynge akissummini allappoq ukiut tallimat kingulliit Royal Arctic Linep assartuinermut akigititai 10 procentimik qaffassimasut.

Atuaruk: Assartuinermi akinik qaffaanissaq suli isumaqatigiissutigineqanngilaq

Kisitsisit kukkusut
Kalaallit Nunaanni Brugsenimi pisortaaneq Susanne Christensen aamma Pisiffik A/S-mi pisortaaneq Per Steen Larsen sisamanngornermi ataatsimoorlutik tusagassiutinut nalunaarput Steen Lyngep kisitsisit saqqummiussai eqqortuunngitsut. Pisiniarfinni qullersaanerit oqaatigaat assartuinermu akit piviusumik qaffariaataat 25 procentiusimasoq.

- Assartuinermut aki ataatsimoortoq tassaavoq immakkut assartuineq, nassiussisup umiarsualiviillu tigusisussat suliamik passussinerat, uuliamut aamma aningaasat nalingannut tapiliussaq, MRN-mut akitsuut kiisalu aningaasaliissuteqarnermut akiliut. Assartuinermut akit tassaapput immakkut assartuineq aamma nassiussisup umiarsualiviillu tigusisussat suliamik passussinerat. Tassa assartuinermut akit innersuussutikka taakkuupput. Malitsigisaanik paasivara, assartuinermut akit februari 2011-mi 1,5 procentimik qaffassimasut. Qaffariaat taanna ajoraluartumik RAL-ip Namminersorlutillu Oqartussat arajutsisimavaat, Steen Lynge nalunaarpoq

Akit qaffassanerpat
Taassuma maanna erseqqissaatigaa ukiut tallimat kingulliit akit qaffariaatigisimasaat 25 procentiusoq.

Kalaallit Nunaanni Brugsenip aamma Pisiffik A/Sip aarleqqutigaat assartuinermi akit qaffassappata nioqqutissat sanaartornerullu akitsornissaat. Taakku ujartorpaat oqaloqatigiinnikkut Royal Arctic Linep isertitsiffigisinnaasaanik allanik ujarlernissaq assartuinermi akit qaffariarnissaat pinngitsoorniarlugu.

- Politikkeritut soqutigaara, RAL-mi pitsaasumik ingerlatsineq assartuinermut akit qularnaassagaat. Kisiannili Naalakkersuisut assartuinermut akinik qaffaanermut aatsaat akuersaarsinnaapput, allanik periarfissaqanngippat. Taamaattumik Naalakkersuisut misissornialerpaat, assartuinermut akinik qaffaanermut taarsiullugu sunik allanik periarfissaqarnersoq. Taamaattumik qaffaassuteqarnermut qinnuteqaammut Naalakkersuisut suli isumminngillat. 2011-mi assartuinermi akit qaffariaataat RAL-mit qinnuteqaatip suliarinerata nanginnerani ilanngunneqassaaq, Steen Lynge oqarpoq.

Powered by Labrador CMS