Steen Lynge: Kiffartuussinermut isumaqatigiissutit atorunnaarsinneqarlik

Disko Linep Kujataani kiffartuussinermut isumaqatigiissutinik sumiginnaasoq, Demokraatit qinigassanngortitaat Steen Lynge isumaqarpoq.

Inatsisartunut qinigassanngortittut uani sapaatip-akunnerani Kujataani angallanneq qanoq pisarnersoq nammineerlutik misigaat – imaluunniit qanoq ajoquteqarnersoq.

Tamannalu aatsaat iliuuseqarniarnissamut pissutissaqalersitsigunarpoq. Siullermik Anders Olsenip (S) siunnersuutigaa, qulimiguulik S-61 Kujataanukartinneqassasoq. Maannalu angallannermut kiffartuussinissamut isumaqatigiissut atorunnaarsinneqartariaqartoq, Steen Lynge (D) oqariartuuteqarpoq.

- Kiffartuussinissamut isumaqatigiissuteqarniarnermut piumasaqaataasut ullumikkut malinneqanngilaq. Piumasaqaatillu isumaqatigiissuteqartumit sumiginnarneqarput, tassa Disko Linemit.

- Tamatuma saniatigut isumaqatigiissut ingerlatseqatigiiffiup tungaanit malinneqanngilaq.

Sikorsuit aamma sila pissutaalluni uani Kujataani angallannermik ajornartorsiortitsipput. Kisianni isumaqatigiissutini tamannarpiaq taamaattoqaraluartoq angallanneq ingerlasussaasoq, Steen Lynge oqarpoq.

- Taamaattumik ingerlatseqatigiiffiup tungaanit piumasarineqarpoq, imaatigut angallannikkut taamaatitsisoqassagaluarpat qulimiguullit marluk angallassinissaat ingerlatseqatigiiffiup Disko Linep isumagisussaavaa. Kisianni taamaattoqanngitsoq ullumikkut paasinarsivoq.

- Ilaasut imaatigut angallanneqarsinnaannginnerisa nalaanni – ullut allat angallassiviusinnaanngitsut assigalugit – qulimiguulik ataasiinnaq atorneqarpoq.

Steen Lyngep oqarnera naapertorlugu kiffartuussinissamut isumaqatigiissutinik tamanna unioqqutitsineruvoq.

Kinguaattoornerillu Disko Linep ilisimatitsissuteqartarnerata tamanna pitsaanerulersinngilaa.

- Tamatuma saniatigut ilisimatitsisoqanngingajavittarpoq. Ilisimatitsisarneq amigarpoq, amerlanertigullu ilaasut nammineerlutik ingerlatseqatigiiffik arlaleriarujussuarlutik saaffigeqqaarlugu angalanerup ingerlaqqinnissaa paasisaqarfigisarpaat.

Powered by Labrador CMS