Steen Lynge: – Sapinngisara tamaat angallanneq pitsanngorsarniarpara

– Takusimavara sumiiffiit ilaanni ilaasunik angallassinermi aaqqiissutit naammagineqanngitsut, taamaattumik sapinngisara tamaat angallanneq pitsanngorsarniarpara, innuttaasunut inuussutissarsiornermullu iluaqutaasumik.
Taamatut oqarpoq peqqissutsimut attaveqarnermullu Naalakkersuisoq Steen Lynge, Atassut, tamannalu pivoq nunaqarfinnut isorliunerusunullu ilaasinik angallassinermut sullissinissamik isumaqatigiissutinut nutaanut neqerooruteqarnissamut atortussat tamanut saqqummiunneqarnerannut atatillugu.
Taanna oqarpoq Naalakkersuisut aningaasanut atugassiissutinut angallassinerup sapinngisamik annertunerpaap anguneqarnissaa pingaartikkaat, aammalu sumiiffinni arlalinni periarfissaqarpoq umiarsuarmik timmisartumillu ataatsimoortillugit angallassinissamut.
– Taamaattumik angallassiniartut kajumissaarneqarput nutaanik eqqarsaqqullugit aaqqiissutissanillu allaanerusunik saqqummiusseqqullugit, angallasseriaatsimik pitsaanerpaamik pilersitsisumik. Sullissinissamik isumaqatigiissutitigut qulakkeerneqassaaq nunami tamarmi angalasinnaanissaq billetsinut naammaginartumik akilinnut, Steen Lynge oqarpoq.
Juunip naalerneranut qinnuteqarnissamut killissaqarpoq. Tamatuma kingorna neqeroorutit ataasiakkaat nalilersorneqassapput akit, pilersuinissamut qularnanngissuseqarneq pitsaassuserlu aallaavigalugit. Tamatumalu kingorna naatsorsuutigineqarpoq aggustip qiteqqunnerani qinnuteqartut isumaqatigiinniarfigineqassasut, tamatumalu kingorna isumaqatigiissusiortoqarluni.
Naatsorsuutigineqarpoq isumaqatigiissutit nutaat atuutilissasut 2015-imi januaarip aallaqqaataani.*