Takster
Steen Lynge: Meeqqanut iPad-it tapersersorparput
– Naalakkersuisut aaqqiissutissarsiorput Villum Fondenimit tunissut atuartut iluaqutiginiassammassuk. Tamannali pissaaq inatsisit atuuttut iluanni, Naalakkersuisunut ilaasortaq Steen Lynge oqarpoq
Kommunini marlunni, Kommune Kujallermi aamma Qeqqata Kommuniani, atuartut ilinniartitsisullu 3.000-t aasakkut atuanngiffeqarnerup kingorna atuarnerup aallartinnerani iPad-inik tunineqassappata tamanna pisortanut qanoq akeqassanersoq naatsorsorneqaqattaarpoq.
iPad-it Villum Fondenimit tunissutaapput, kommunillu taakkua marluk kissaatigaat meeqqat aalajangersimasumik appasissumik akilimmik nettimut isersinnaassasut - aamma angerlarsimaffimminnit. Akili tamanna maanna tele-mi akiliutinut sunniuteqassanngilaq.
– Naalakkersuisut suliniut tapersersorpaat meeqqallu ilisimasaqarnerulernissaat anguniarlugu suliniutip iluatsinnissaanik qulakkeerinnittussamik Naalakkersuisut aaqqiissuteqarnissaminnut piumassuseqarlutik. Atuisut allat eqqugaavallaannginnissaannik kinguneqartussamik Naalakkersuisut aaqqiissuuteqarniarput, peqqissutsimut attaveqarnermullu Naalakkersuisoq Steen Lynge, Atassut, tusagassiorfinnut nalunaarutikkut allappoq.
Aamma atuaruk: iPad-inik tunissutit Telep taperserpaa
Tamanna pivoq Qeqqata Kommuniani borgmesterip Hermann Berthelsenip, Siumut, knr.gl-ikkut Naalakkersuisut qinnuigereerai qanoq iliuuseqaqqullugit.
– Naalakkersuisoqarfiga qinnuigisimavara misissoqqullugu inatsisit atuuttut iluanni suliniut ingerlanneqarsinnaanersoq, Steen Lynge oqarpoq.