Steen Lynge Atassutip inuusuttaanit taperserneqarpoq
Atassutip inuusuttaasa - Steen Lyngep (A) piumasaa assigalugu - urani pillugu innuttaasunik taasisitsisoqarnissaa piumasaraat
Urani pillugu innuttaasunik taasisitsisoqassava?
Atassummeersup Steen Lyngep taasisitsisoqarnissaa kissaatigaa, tamannalu sapaatip akunnerani kingullermi Nuuk TV-mi oqaatigaa.
Taassuma partiimi siulittaasuata Knud Kristiansenip apeqqut taanna akiumanngilaa, Steen Lyngeli naapertorlugu partiimi siulittaasumi tamatumani tapersinngilaani.
Taasisitsinissaq akuersaarpaat
Maanna Atassutip inuusuttai oqallinnermut akulerupput. Taakkualu Steen Lynge taperserpaat.
– Innuttaasut ataqqissavavut, taamaattumillu urani pillugu innuttaasut taasitinneqartariaqarput, Atassutip inuusuttai sinnerlugit tusagassiorfinnut nalunaarutikkut Bentiaraq Ottosen allappoq.
– Innuttaasunik taasisitsineq isumaqanngilaq Kalaallit Nunaat sangujoraartumik ingerlatsisoq. Taasisitsinerummi takutissavaa uranimik piiaanissaq innuttaasut kissaatigineraat, Bentiaraq Olsen erseqqissaavoq.
Atassutip inuusuttai: Isummat tunngavigisat qimannagit
Taanna nangilluni allappoq Atassutip partiitut isummat tunngavigisani aalajangiusimasariaqarai.
– Partiip Atassutip isummat tunngavigisani aalajangiusimallugillu aalajangiusimasariaqarpai, partiip sinnaakkutarisai qimannagit. Partiimi tamatigut unneqqarissumik, tatiginartumik kiisalu innuttaasunik ataqqinnittumik nalunaaruteqartarpoq, Atassutip inuusuttai oqarput.