Steen Lynge: Akisussaaffimmik tigusigit, Justus

Sermitsiaq.AG-p pingasunngormat ullaap tungaani allanneratut kommunalbestyrelsimut Inatsisartunullu ilaasortaq Justus Hansen (D) Tasiilap kivinneqarnissaanut siunnersuutinik arlalinnik saqqummiussivoq.

Ilaatigut tikkuarpaa Namminersorlutik Oqartussat Kommuneqarfik Sermersoorlu qanimut suleqatigiilertariaqartut, meeqqanik inuusuttunillu isumaginninnermut suliasarpassuit iliuuseqarfigineqarnissannut.

Kanngunartoq

– Kanngunartuliorneruvoq isumaginninnikkullu sumiginnaanerujussuulluni suliassat taama amerlatigimmata. Tamakkua salliutillugit suliniuteqartoqartariaqarpoq suliassarpassuit iternga tikillugu misissorlugit, taamaasilluni eqqorneqartut paasisaqartillugit inuunertillu ingerlateqqissammassuk, Justus Hansen oqarpoq.

Akisussaaffimmik tigusigitsi

Steen Lyngep (A) Justus Hansen isumaqatigaa oqarmat pisortat sumiginnaasimasorujussuusut.

Politikerilli Atassummeersup Justus Hansen isornartorsiorpaa, oqarluni Sermersuumi kommunalbestyrelsimut ilaasortatut akisussaaffimmik tigusisariaqartoq.

– Demokraatit IA peqatigalugu kommunalbestyrelsimi amerlanerussuteqarput. Kommunalbestyrelsip akisussaaffigaa ajornartorsiutit piaarnerpaamik aaqqinneeqarnissaat, sulisunillu naammattumik sulisoqassalluni isumaginninnermi suliassanik isumaginnittussanik, Steen Lynge allappoq.

Kommunip pisuussutigaa

Taassuma erseqqissarpaa isumaginninnikkut ajornartorsiuterpassuit Tasiilami mittarfiliornikkut aaqqinneqarsinnaanngitsut.

– Kommuneqarfik Sermersuup isumaginninnermik suliassarpassuarnut akisussaaffini sumiginnarsimavaa, suliamillu suliannittut amerlavallaanik suliassittarsimallugit. Oqaatigineqarpoq suliassat 500-t sinneqartuusut, suliassanullu tamakkununnga sulisut pingasuinnaat isumaginnittuusut. Tamanna kimilluunniit akuerineqarsinnaanngilaq, politikeri Atassummeersoq tikkuaavoq.

Nangipporlu:

– Justus, sulilerniarit, tassami kommunalbestyrelsimi sukkanerpaamik allannguisinnaavutit, akisussaaffik allanut tutsinniaannarnagu, Steen Lynge oqarpoq.