§37-mi akissut: Paarlutik ajunaarsimasut qitornaat taarsiivigineqarnikuupput

Nunasiaateqarnerup nalaani piniartut allakkisarlutik paartut ajunaarsimasut pillugit Anthon Frederiksen, Partii Naleraq, Naalakkersuisunut apeqquteqaateqarpoq. Tassani paaserusuppaa, allakkisarlutik paartut ajunaarsimasut qitornaannut taarsiisoqarsimanersoq.

- Paarlutik ajunaarsimasut qitornaat suli amiakkoqarmata, taakku taarsiivigineqarsinnaanermut qinnuteqarsinnaanerat pillugu Naalakkersuisut sulissuteqarsinnaanersut?, Anthon Frederiksen aperaaq.

Taarsiissutit
Kommuninut, nunaqarfinnut, isorliunerusunut, attaveqarnermut ineqarnermullu naalakkersuisoq Erik Jensen (S) apeqqut akiniarlugu Nunatta Katersugaasiviani Allagaateqarfianilu misissuisimalluni akivoq. Nunatta Allagaateqarfiata toqqortani misissuinermini paasivaa, Kalaallit Nunaanni Aqutsisoqarfimmik sullissitillutik ajunaarsimasut qimataannut taarsiissuteqarnissamut maleruagassanik aalajangersaasoqarsimasoq.

- Taarsiissutissat qaammammoortumik uillarnernut qitornaanullu akiliutitut tunniunneqartarsimapput. Tamatumani aamma piniartut, namminneerlutik allakkisarniarlutik aalajangersimasut pineqarput, Erik Jensenip apeqqut akivaa.

Nalunaarsuisoqartarsimanngilaq
Piniartut allakkisarlutik paartut ajunaarsimasut nalunaarsorneqartarsimanersut Anthon Frederiksenip aamma apeqqutigaa.

- Nunatta Allagaateqarfia nunasiaataanerup nalaani piniartunut qaannamik allakkisarnermut atatillugu ajunaarsimasunut nalunaarsuiffimmik peqartoqarnersoq aperineqarpoq. Nunatta Allagaateqarfia akivoq, allagaateqarfik toqqortaatinik taamaattunik peqanngitsoq. Nunatta Allagaateqarfianit iisimatitsissutigineqarpoq, nalunaarsuiffimmik taamaattumik peqartoqartuuppat pigissagaluaritsik ilimagalugu, Erik Jensen akivoq, ilanngullugu oqaatigaa oqaluttuarisaaneq misissuiffigineqartariaqartussaassasoq nunasiaataanerup nalaani piniartunut qaannamik ajunaarsimasunut nalunaarsuiffiliortoqassappat.