Frivillige
Sponsorimik isumaqatigiissut kajumissutsiminnik ikiuuttartunik amerlanernik pilersitsissaaq
Royal Unibrew aningaasaliissuteqarnissamik Kalaallit Nunaanni Timersoqatigiit Kattuffiannik isumaqatigiissuteqarpoq
Timersortartunik kajumissutsimik ikiuuttartuuneq maanna oqinnerulissaaq.
Kajumissutsimik ikiuuttartuuneq oqinnerulersinniarlugu Royal Unibrew-ip, nioqqutissanik ´Faxe Kondi´-mik ´Aqua Coral Imeq´-millu tuniniaasartutut ilisimaneqarnerusup, Kalaallit Nunaanni Timersoqatigiit Kattuffiat aningaasaliissuteqarnissamik isumaqatigiissuteqarfigeqqammerpaa, taamaasillunilu Faxe Kondi Puljemit aningaasaliissutut 50 procentimik amerlillugit.
Kajumissutsiminnik ikiuuttartunut nukiit amerlanerusut
Taamaasilluni Timersoqatigiit Kattuffiannut ilaasortat tamarmik siunissami ukiumut pingasoriarlutik qinnuteqarsinnaalerput.
– Nuannaarutigeqaarput Royal Unibrewip timersornermut akuunerup naleqassusia takusinnaammagu. Peqatigiilluarsimanerput pissutigalugu suleqatigiinnerup nanginneqarnissaa qanittuusimavoq, Kalaallit Nunaanni Timersoqatigiit Kattuffianni generalsekretær Carsten Olsen tusagassiorfinnut nalunaarutikkut allappoq.
Kalaallit Nunaanni Timersoqatigiit Kattuffiata Royal Unibrewillu aningaasaliissuteqarnissamik nutaamik isumaqatigiissuteqarnerisigut siunertaavoq klubbit kajumissutsiminnillu ikiuuttartorpassuit nukiit amerlanerusut atorsinnaalissagaat sammisassanik sungiusarnermillu pitsaanerusumik pilersitsinermut.
– Taamaasillunilu piffissaq ungasinnerusoq isigalugu Kalaallit Nunaat peqqinnerusoq pilersillugu, Carsten Olsen oqarpoq.