Søren E: Aleqa Nielson Mandelasoraaq

Søren Espersenip Aleqa Hammondip Naalakkersuisut siulittaasutut sulinera pitsaanngitsutut nalilerpaa. Kalaallit Danskillu suleqatigiinnerannut Aleqa Hammond ajoqutaasutut isigaa.

Søren Espersenip JyllandsPostenimi taama isummersorpoq. Naalagaaffiup aningaasartuutaanik kukkunersiuineq kiisalu naalagaaffiup kukkunersiuisarnera isummersorfigai.

Nunani allanit Danmark peqquserluffiunngitsutut kammalaatersorfiunngitsutullu isigineqarpoq Naalagaaffiup aningaasartuutaanik kukkunersiuisarneq kiisalu naalagaaffiup kukkunersiuisarnera sulinerat pissutaalluni. Ukiumulli tapiissutigineqartartut aqunneqarsinnaanngillat, tassaapput taakku Kalaallit Nunaannut ingerlanneqartartut.

- Tapiissutigineqartartut naalakkersuisutsinnit Kalaallit Nunaannut tunniunneqartartut nalusarpaat sumut atorneqarnersut. Innuttaasut akileraarutaat sumut atorneqartarpat? Atorneqartarnerat isumatusaarnerua? Naalakkersuisutta naluaat sumut aningaasat atorneqartarnersut!

- Naalagaaffiup kukkunersiuisartuisa misissortarpaat nunanut ineriartortunut nunarput tunniussileraangat ilumut aningaasat ajunngitsumik atorneqassanersut. Misissorneqanngisaannarporli Kalaallit Nunaannut aningaasat qanoq atorneqartarnersut. Ukiut tamaasa 3,8 milliard koruuninik tapiisoqartarpoq. Naluneqarporli aningaasat sumut tuttarnersut qanorlu atorneqartarnersut. Kalaallit Nunaata Naalagaaffiup kukkunersiuisartui soraarsinnikuuaat, Søren Espersen oqarpoq, Kalaallit Nunaata nammineerluni aningaasanik aqutsilluarsinnaanera apeqquserlugu.

Mamianartuliat arlaqartut
Søren Espersenittaaq apeqquserpaa Namminersorlutik Oqartussat naatsorsuuserisartuisa ilumut suliassatik iluamik aallunneraat.

- Misissuisoqartariaqarpoq. Kalaallit Nunaat aqunnerlutaavoq Siumumit naalakkersorneqartillugu. Kammalaatersortoqartarpoq, kammalaatit qaffasissuni atorfinitsinneqartarput, aningaasatigullu mamianartuliat imaaginnavittarlutik. Naalagaaffiup kukkunersiuisartui Kalaallit Nunaat soqutigisaminnut kisimi aningaasanik atuinerat misissortariaqalerpaat.

Danskit akileraarutitigut akiligaat milliard koruunit Kalaallit Nunaata landskarsiat imaarutiinnavissoq immersortarpaat, Søren Espersen allakkamini ilaatigut oqarpoq.

Asissuineq qujanerlu
- Kalaallit Nunaata 'qujassutaa' 2014-imut aana. Danmark asissorlugulu qujassuteqarfigaat naalagaaffeqatigiinnermit aniumallutik, tamanna Naalakkersuisut siulittaasuata Aleqa Hammondip akisussaaffigaa. Aleqap Danmark nuannarinngilaa, periarfissinneqaraangami Danmark nuanninngitsunik oqaaseqarfigisarpaa. Arnaq taanna Nelson Mandelasoraaq 'eqqissilluni toqorusuttoq'. Danmark ajunngitsumik oqaaseqarfigigaarngagu miseraq kajortoq kisimi eqqaasarpaa. Periarfissinneqarnerit tamaasa Danmark Kalaallit Nunaatalu suleqatigiinnerat ajortisartuaannarpaa. Naalagaaffeqatigiinnitsinni qaqagu tamakku akuersaaginnarsinnaajunnaassavagut?

Dansk Folkepartimi Folketingimut ilaasortaq Søren Espersen oqarpoq.