soraarsitsisoqareersoq
Soraarsitsiortornermut atatillugu kattuffinnik suleqateqarneq Sermersuup unitsippaa
Kommuneqarfik Sermersuup kattuffinnik suleqateqarneq unitsittariaqarpaa kommunimi atorfeqartunik 47-nik soraarsitsisoqareersoq. Ataatsimeeqatigiinnermi kattuffiit aniinnartut pingasunngormat
Kattuffiit arfinillit Kommuneqarfik Sermersuup sulisuminik 47-nik soraarsitsinerannut isornartorsiuinerat pillugu pingasunngormat ataatsimeeqatigiipput. Ataatsimiinnermi Kommuneqarfik Sermersuup Kattuffiit AK, ASG, NPK, PK, SIK aamma Imak suleqatigiunnaarlugit nalunaarpoq.
Kommuneqarfik Sermersuumi pisortaaneq Steffen Ulrich-Lynge nalunaarpoq.
- Ajoraluartumik Kommuneqarfik Sermersuup suleqatigiinneq unitsittariaqarpaa, oqaatigineqarpoq.
Soraarsitsiortornermut atatillugu suliatigut peqatigiiffiit suliap ingerlaneranik ataavartumik paasitinneqartarnissaat qulakkeerniarlugu, ilaasortaminnullu piareersaanissaminnut periarfissaqarluarniassammata, piumasaqaataanngitsumik suleqatigiissitamik, Kattuffiit Isumaqatiginninniartartuinik SIK-lu peqatigalugit, Kommuneqarfik Sermersooq pilersitsisimasoq Steffen Ulrich-Lynge nalunaarpoq.
- Suliatigut kattuffiit toqqaannartumik kommunimik isumaqatiginninniarsinnaallutik naatsorsuutigisimagaat paasivarput. Soorunami taamaattoqartussaanngilaq. Kommunimi Pingaarnertut Suleqatigiinnissamut Ataatsimiititaq isumaqatiginninniartussaatitaavoq, tamannalu soorunami ataqqivarput, Steffen Ulrich-Lynge tusagassiutinut nalunaarummi oqarpoq.
- Suliamut tassunga atatillugu suleqatigiinneq taamatut unittariaqarmat soorunami ajuusaarutigaarput. Kommune suliatigullu kattuffiit ataatsimoorlutik pisumi ilungersunartumi sulisunik isumaginninnermik suleqatigiinnissaat neriuutigisimagaluarparput, Kommuneqarfik Sermersuup pisortaanera oqarpoq.
Kattuffiit ataatsimiittarfimmit anisut
Kattuffiit AK, ASG, NPK, PK, SIK aamma Imak tusagassiutinut ataatsimut nalunaarumminni allapput Kommuneqarfik Sermersuumik ataatsimeeqateqarnerminni pingasunngormat aniasimallutik.
Kommuneqarfiup kilisaanera pillugu ataatsimiinnissamut isumaqatigiittoqarsimavoq.
- Sulisut kattuffii ataatsimiinnerni peqataasimapput suliap ingerlanneqarneranut pitsaasutsip qularnaarneqarnissaa anguniarlugu. Ullumikkut kommunip pisortaanerisa ataatsimeeqatiginerini erseqqissivoq, kommuni kattuffiillu ataatsimiittarnerminni naatsorsuutigisaat assigiinngissuteqartut. Kommunimi pisortaanerup ullumi ataatsimiinnermi erseqqissumik oqaatigaa, ataatsimiinnerit pisortatigoortuunngitsumik pituttuinngitsumillu ingerlanneqassasut, aammalu sulisut kattuffiisa ataatsimiinnerni saqqummiunneqartut allatigut atorsinnaassanngikkaat, ataatsimiinnermi peqataajunnaareernermi kingorna AK, ASG, NPK, PK, SIK aamma Imak tusagassiutinut nalunaaruteqarput.