soraarsitsinerit

Soraarsiortortitsisoqareersoq: Demokraatit Vittus isornartorsiorpaat

Aningaasaqarnermut naalakkersisup Kommuneqarfik Sermersuup aningaasaqarneranut akisussaaffimmik tigusiumannginnera Demokraatinit isorineqarpoq

Randi Vestergaard Evaldsen

Utaqqiisaagallartumik naligiissaarnermut iluarsartuussineq pissutigalugu Kommuneqarfik Sermersuumut annertuumik eqquivoq, kommuni 75-nik soraarsitsisariaqalerneranik kinguneqartumik.

Kommunalbestyrelsip marlunngormat soraarsitsinissat aalajangermagu peqataanik atorfinitsitsinerit unitsinneqarput taamatullu aamma siunnersortinik avataaniittunik atuineq aamma unitsinneqarpoq.

- Kommuneqarfik Sermersuup maanna sipaarutissarilersimasai ajoraluartumillu sulisuminik innuttaasunillu eqquingaatsiarpoq, tamannalu pissuteqarpoq Kommuneqarfik Sermersuup aningaasatigut ingerlatsinermini amigarluinnartumik nakkutiginninnginnerminut. Tamannalu aqutsinerlunnerup kingunerisimavaa aningaasaateqarnerup 300 million koruuniusut katinneqartut, ukiup nikinnerani ukioq-manna 23 million koruuninut appariarnerat. Nakkutilliisut kiisalu kommunep naatsorsueqqissaartarfiata ukiuni arlalinni tikkuartuutigisarsimavaa, pissutsilli malinneqarsimanngillat aaqqinneqaratillu, aningaasaqarnermut naalakkersuisoq Vittus Qujaukitsoq Siumut oqarpoq.

Akisussaaffik
Taama naalakkersuisumit qisuariartoqarnera Demokraatinit isumaqatigineqanngilaq.

- Kommuneqarfik Sermersuup aningaasaqarneranut aningaasaqarnermut naalakkersuisup Vittus Qujaukitsup akisussaajumannginnera tupinnarpoq. Aningaasaqarnermummi aqutsisuuvoq, Demokraatit siulittaasuata tullia Randi Vestergaard Evaldsen tusagassiutinut nalunaaruteqarpoq.

- Vittus Qujaukitsoq pisooqataavoq. Akisussaaqataannginnerminut oqaaseqarnera tupinnartorujussuuvoq, Randi Vestergaard Evaldsen oqarpoq.

Naatsorsueqqissaartarfiup saqqummiussaa kommunep 2013-imi amigartoorutai 48 million koruuniusut innersuutigaa. Taassumalu saniatigut kommunalbestyrelsep 2013-imi immikkut aningaasaliissutit 100 million koruuniusut tunniussimallugit, tassa siumoorluni naatsorsuutit sipporlugit.

Powered by Labrador CMS