Soraarnerussutisiat pillugit isornartorsiut itigartikkaat

Suliaq eqqumaffigilluarparput. Toqqaannartumik aamma attavigisimagaluarutsigut, assinganik akissutissarsisimassagaluarpusi!

Sulisitsisut aamma kattuffiit arlallit ammasumik allagaqarnermikkut Naalakkersuisunut Inatsisartunullu soraarnerussutissianut aaqqissuusseqqinnermut atatillugu eqqorneqaratarsinnaanerat maluginiaqqusinerisa kingorna, aningaasaqarnermut akileraartarnermullu naalakkersuisumit, Aqqaluaq B. Egedemit (IA) oqariartuut taama nipeqarpoq.

2017-imit atuutilertussaq
Aaqqissuusseqqinnissaq upernaakkut Inatsisartut ataatsimiinneranni akuerineqarpoq, taamaalilluni 2017-iminngaanniit soraarnerussutisianut nunani allani akiliutit nalinginnaasumik akissarsineq assigalugu akileraaruserneqartalissaaq, ullumikkut ataasiakkaanut aatsaat akiliutigineqaraangata akileraaruserneqartaraluarput.

Inunnut eqqorneqartunut aaqqiissutip aningaasartuutit 800 koruunit tikillugit qaammammut saniatigut aningaasartuuteqarnerulersitsineq kingunerisinnaagaa, peqatigiiffinnit maannamut kisitsinerit takutippaat, tassani ingammik angajoqqaat kisermaat eqqorneqassallutik.

Sulisut paaqqinnittarfinnut aamma efterskolenut tapiissutit annaaratarsinnaaneri, inatsisit nutaat kingunerisinnaagaat peqatigiiffiit aarlerisaaripput, pappiaqqatigut isertitaat amerlanerulerneri pissutigalugu, naak ulluinnarni aningaasaqarnerat allannguuteqanngikkaluartoq.

Atuaruk: Kattuffiit soraarnerussutisianut aaqqissuusseqqinnernut aarlerisaarisut

Siunertaq malinneqanngitsoq
Inunnut eqqorneqartunut aaqqiissutip aningaasartuutit 800 koruunit tikillugit qaammammut saniatigut aningaasartuuteqarnerulersitsineq kingunerisinnaagaa, peqatigiiffinnit maannamut kisitsinerit takutippaat, tassani ingammik angajoqqaat kisermaat eqqorneqassallutik.

- Tamanna Naalakkersuisut toqqaannartumik siunertaannit, akissarsiortut kalluarneqassanngitsut soraarnerussutisiat akileraaruserneqarnerata siuartinnerani, unioqqutitsineruvoq, Sulisitsisut, IMAK, Atorfillit Kattuffiat, Peqqissaasut Kattuffiat kiisalu NPK Naalakkersuisunut aamma Inatsisartunut ammasumik allagaqarnerminni taama oqariartuuteqarput.

Aallartereerpugut
- Ajornartorsiut tamanna Naalakkersuisunit qangali nassuerutigineqarpoq, aaqqinniarlugulu suliaqartoqalereerluni, Naalakkersuisut.gl naapertorlugu Aqqaluaq B. Egede taama akissuteqarpoq.

- Siullertut, ajornartorsiutit 2017-imi pilersinnaasut aaqqinneqassapput. Tamanna pissaaq, aningaasarsianit akileraarutit pillugit inatsimmik, Inatsisartut ataatsimiinneranni matumani suliarineqartumi, allanngortitsinikkut pissaaq. Tulliullugu 2017-imi inatsisissatut siunnersuummik, 2018-imi siumullu ajornartorsiutinik takkuttoqannginnissaanut qulakkeerinnittussamik saqqummiussisoqassaaq, ilanngullugu oqarpoq.