Atuarfiit ulorianartut
Sooq meeqqat atuarfinni ulorianartuni atuassappat?
Meeqqat oqaaseqartartuata piumasaraa Namminersorlutik Oqartussat nassuiassagaat sooq meeqqat assersuutigalugu Ilulissani Narsamilu atuarfinni peqqinnissamut ulorianartuni atuartitaassanersut
Meeqqat atuarfiisa Ilulissani Narsamilu peqqinnissamut uloriarnartuunerat pillugu oqallinnermut meeqqat oqaaseqartartuat ilannguppoq. Taassuma toqqissisimanartuutinngilaa Ilulissani Narsamilu atuarfiit iluarsaannissaasa sivitsuloorunneqarnera.
Ilulissani Atuarfik Mathias Storch annertuumik oqoqarmat atuartut peqqissuunissaat ernumassutigineqarpoq.
Narsap atuarfia aamma nungullarsimaqaaq. Aarleqqutigineqarpoq radonimik mingutitsineq annertooq pisoq taamaammat atuarfiup iluarsaanneqarnissaa angajoqqaat nukingisaarutigaat.
Meeqqat oqaaseqartartuat Aaja Chemnitz Larsen aamma meeqqat pillugit ernumaammersimavoq.
- Uanga immikkoortitsinertut isigaara Namminersorlutik Oqartussat centraladministrationiani allaffeqarfiata annerpaartaani oqummik nassaarfigineqarmat sulisut tuaviortumik allamut nuunneqarmata. Meeqqalli pineqartimata taava ulorianarpallaarunnaarpa?, Aaja Chemnitz Larsen aperivoq.
Ilimagisamit akisuneruvoq
Maanna Namminersorlutik Oqartussat qinnuiginiarpai nassuiaatigineqassasoq sooq meeqqat atuarfinni taakkunani marlunni taama pineqarnersut.
- Ullumikkut suliffimmi isumannaallisaanikkut pissutsit eqqartorneqaraangata inersimasut kisimik eqqarsaatigineqartarput. Kisianni meerartagut ullormut akunnerpassuit meeqqerivinniittarput atuarfinniillutillu, taakkunanilu ”suliffeqarlutik”, tassalu peqqissutsimut tunngatillugu ulorianartuunngitsunik atugaqarnissartik piumasarissallugu pissutissaqarluarput, Aaja Chemnitz Larsen oqarpoq.
Maanna paasinarsivoq Narsap atuarfia 2014-mi aatsaat iluarsartuunneqarsinnaasoq. Inuit Ataqatigiit pillugit Inatsisartuni ilaasortaq Kalistat Lund paragraf 37 naapertorlugu apeqquteqarpoq Narsap atuarfiat iluarsartuunnissaa pillugu.
Narsap atuarfiata iluarsartuunnissaa ilimagisamit akisuneruvoq. Naatsorsuinerit siulliit takutippaat 45 millioner koruuninik akeqassasoq. Maannali paasinarsivoq iluarsartuussineq 68 millioner koruuninik akeqassasoq.
Iluarsartuussinerup aallartinnissaanut Kommune Kujalleq aamma Namminersorlutik Oqartussat aningaasaliissutissanik nutaanik nassaarniaqqaartussaasut, ineqarnermut naalakkersuisup Miiti Lyngep Partii Inuit-neersup akissutaani erserpoq.
Ilulissani Atuarfik Mathias Storchimi meeqqat qanoq pineqarnissaat pillugu Qaasuitsup Kommunia pingasunngornermi oqaaseqartissinnaasimanngilarput.