Sofia Geisler: Akuerisaanissamut piumaqasaqaaatit attorneqassanngillat
Ukiut qulit qaangiuppata meeqqat atuarfiini ilinniartitsisut 300-t amigaatigineqalissapput. Siumup akerlianik IA-p ilinniartitsisunngorniarfimmut akuerisaanissamut piumasaqaatit sakkukillinianngilaat.
Ilinniartitsisunngorniarfimmi ilinnialernissamut piumasaqaatit sakkukillineqarnerisigut ilinniartitsisunik amigaateqalernissaq iluarsiivigineqarsinnaanngitsoq, Sofia Geisler Inuit Ataqatigiinneersoq isumaqarpoq.
Pitsaassusaa ajornerulissasoq
- Ilinniartitsisunngorniarnissamut piumasaqaatit sakkukilligutsigit, meeqqat atuarfianni atuartitsineq ajornerulersissavarput. Tamanna kissaatiginngilarput, Sofia Geisler taama oqarpoq, taanna partiimi ilinniartitaanermut tunngasunik oqaaseqartartussaatinneqarpoq.
Ilinniartitsisut amigaataalernissaannik ajornartorsiuteqalernissaq pillugu taanna maannakkorpiaq aalajangersimasumik aaqqiissutsisamik siunnersuutissaqanngilaq. Taassuma meeqqat atuarfianni atuartitsinerup pitsaassusaanik maannakkorpiaq nukittorsaastaasinnaasunik oqaatigisaqarpoq.
- Ullumikkut ilinniartitsisunut taartaasartunik ilinniarsimanngitsunik amerlasuunik peqarpugut. Taakku piginnaanngorsartariaqarpagut, atuartitsinerup pitsaassusaa nukittorsarniassagatsigu, Sofia Geisler oqarpoq, taakkununnga pikkorissaanerit aamma ilinniartitseqqinnerit sorliit neqeroorutigineqarsinnaanersut qimerloorneqassasoq oqaatigaa.
Oqariartuuteqartoq
Meeqqat atuarfiannut akisussaasoq naalakkersuisuusimasoq, Doris J. Jensen, Aasianni qinersisartunik ataatsimiititsinermi ilinniartitsisut amigaataalernissaat pillugu nalunaaruteqarpoq, tamatumalu qanoq iluarsinissaanut siunnersuuteqarluni.
Ilinniartitsisut ilinnialernissamut piumasaqaatit sakkukillineqarnissaannut siunnersuut maannamut siammasissumik akerliuffigineqarpoq. Sulisitsisut, IMAK – ilinniartitsisut kattuffiat aamma Ilinniarfissuami pisortap tamanna aqqutissaanngitsoq isumaqatigiissutigaat.