Kajumissaat
Sørine Steenholdt nersornaammik pilersinneqaqqammersumik nersornaaserneqarpoq
Zombiit Nunaannik atuakkiortoq kajumissaammik nersornaaserneqarpoq
Inuiattut ullorsiornitsinni atuakkiortoq saqqummerlaaq isumalluarnartoq Sørine Steenholdt kajumissaammik 10.000 kr-inik aningaasartalimmik Kultureqarnermut Naalakkersuisumit Nive Olsen-imit nersornaaserneqarpoq.
Zombiit Nunaat
Atuakkiornermut unammisitsisarnernut arlalinnut ilaasareerluni Sørine Steenholdtip atuakkiani Zombiit Nunaat siorna saqqummersippaa, Danmarkimi nunatsinnilu tusagassiutinit nersualaarneqaqisoq.
Zombiit Nunaat aamma tassaavoq Nunat Avannarliit Ministerrådiata atuakkamut nersornaasiuttagaanut ataqqisaasumut nunatta ukioq manna innersuussaa.
Katuami nersornaasiisoqarmat Sørine Steenholdti pillugu Nivi Olseni ilaatigut oqarpoq:
Isumassuinermik sumiginnaaneq
– Saqqummersitseqqaarnermigut takutippaa sapernagu silarsuatsinnit piviusumit misigisaminik atuakkiorneq sakkugalugu allaaserinnissinnaaneq, taakkualu oqaluttualiornerup silarsuanut nuussinnaanerat, assigiinngitsunik inuttalimmi pisoqartitsiviusumik. Atuakkiamigut inuiaqatigiinni pissutsit isorinnittumik eqqorluarlugillu allaaserisarpai, soorlu persuttaasarneq, imigassamik atornerluineq aamma meeqqanik isumassugassanik sumiginnaasarneq, taamalu uagutsinnut takutissimallugu inuiaqatigiinni artornartortaasut ingammik meeqqanut qanoq sunniuttarnersut.
Ukiumoortumik tunniunneqartassaaq
Kajumissaat ukiuni tulliuttuni inuusuttumut piginnaasalimmut Kulturikkut Nersornaasiisoqarnerani tunniunneqartarniarpoq.