Siulittaasup Naalakkersuisoqarfia

Søren Hald Møller atorfinitsivinneqarpoq

Kiisami aalajangiunneqarpoq Søren Hald Møller siulittaasup naalakkersuisoqarfiani pisortanngussasoq, tassani pisortaagallarsimalluni februaarip 24-annit Svend Hardenberg tunuarmalli

Kim Kielsen Søren Hald Møllerilu suleqatigiilluartuupput.

Naalakkersuisut isumaqatigiissut tallimanngormat aalajangerput Søren Hald Møller ulloq taannamiit, tassa 2015-imi juunip 12-annit, Siulittaasup Naalakkersuisoqarfianni pisortanngortinneqassasoq.

Søren Hald Møller 1986-imiilli Nunatsinni najugaqarsimavoq pisortanilu sivisuumik atorfeqarsimavoq, ilaatigut namminersornerullutik oqartussani namminersorlutillu oqartussani arlaleriarluni pisortaasarsimalluni, kiiisalu ukiorpaalunni naalagaaffiup sinniisuuatut sulisimalluni, namminersorlutik oqartussanit tusagassiorfinnut nalunaarummi allassimavoq. Tamatuma saniatigut Søren Hald Møller Kommuneqarfik Sermersuumi kommunaldirektøriusimavoq.

– Søren Hald Møllerip, ilisarisimaælualersimasama, suleqatiginissaa qilanaaraara, Naalakkersuisullu aamma ukiorpassuarni pisortatut aammalu pisortani ineriartortitsinermik periusissanillu sulinermik misilittagaasa iluaqutigineqarnissaaat qilanaaraat. Qularutiginngilara Søren Hald Møller misilittakkani pissutigerpiarlugit Siulittaasup Naalakkersuisoqarfianik Namminersorlutillu Oqartussani ineriartornermik pitsaasumik aqutsissasoq, Naalakkersuisut siulittaasuat Kim Kielsen tusagassiorfinnut nalunaarummi allappoq.

Siulittaasup Naalakkersuisoqarfiani pisortatut atorfimmut sisamat qinnuteqarsimapput.

Powered by Labrador CMS