assammik arsarneq
Sønderborgimi assammik arsarluni pissanganartumik unamminermit assit
Arfininngormat ualikkut Sønderjyske aamma GOG Sønderborgimi unammimmata ajuunneq ataasiinnaq nikingassutaavoq
GOG-mut ajoraluartumik Sønderjyske iluatsitsivoq, klubbit taakkua marluk arfininngormat Sønderborgimi Skansen Arena-mi ulikkaangajavissumi unammimmata. Unammineq naammassimmat Sønderjyske 35-34-mik ajugaavoq.
Isiginnaartut 2200-ngajaat unamminermik pissanganartorujussuarmik, assammik arsarnermik nuannarisallit takujumasagaannik, takutinneqarput. Sønderjyskep unammisarfiani isiginnaartut tunngavissaqarluartumik taaneqartarput Danmarkimi assammik arsartunik isiginnaartartut pitsaanersarigaat. Skansen Arenami isiginnaartut 2300-uusinnaapput, tamatigullu ulikkaangajavittarpoq. Isiginnaartorpassuit akeraasut tatisartorujussuuvaat Sønderjyske-lu Skansen Arenami ajugaaffigiuminaatsorujussuuvoq, tamannalumi GOG-p minutsit 60-it ingerlareersut paasivaa.
Jakob Larsenip unammisartui sekundi siullermiilli tamaviaartitaapput. Saassussinerit uteqattaarput.
Minutsit pingasut ingerlariiginnartut arfinilinnik isertitsisoqarluni 3-3-erput. Sukkasuumillu unammineq ingerlaqqippoq. Unamminerup immikkoortuata annersaani Sønderjyske siuaqqavoq. GOG 13-7-imik kinguariataarpoq, Jakob Larsenilu aappassaa timeout-ertariaqarpoq. Unamminermut uterniarluni GOG-p unammeqatigiit assigiinngitsorpassuit misiligarpai. Tamanna iluatsipajaarpoq, muminnermilu fynimiut pingasuinnarnik kinguarsimapput 20-17-imik. Suli neriunartoqarpoq.
Unamminerup immikkoortuata aappa
GOG-miut aallartilluartorujussuupput. Minik Dahl Høegh isertitsisalerpoq, GOG-milu unammilluartorujussuaq Niclas Kirkeløkke peqatigalugu unammisarfimminniittunut ulorianartorsiortitsiuarput, unammisaasali målmandiat Andreas Petersen unammilluaqaaq. 21-21, 22-22 taavalu GOG 24-22-mik aamma 26-24-mik siuarpoq. Isumalluarnartorujussuanngorpoq. 31-31-mik angutipput. Minik Dahl Høegh minutsit sisamat sinneruttut 33-33-mut isertitsivoq, unamminerullu naggataa pissanganartorujussuussaaq. GOG ajugaangajappoq. 34-34-miit unammisarfimminiittut 35-34-mik ajugaapput.
Sekundit 22-t sinneruttut Jakob Larsen timeout-eqqippoq. Unammineq aallarteqqippoq.
Sekundit sisamat sinneruttut Minik Dahl Høeghip iserteriagaa Sønderjyskep målmandiata Andreas Petersenip annaappaa.
Ajugaasinnaagaluarpugut
– Kangunanngilaq Skansen Arenami Sønderjyskemut ajorsarneq. Unammillaqqissuupput tapersersorneqartaqigamillu, soorlu GOG Arenami ilisimasatsitut, unammisarfianni ajugaaffigiuminaatsorujussuupput, Jakob Larsen unamminerup kingorna Sermitsiaq.AG-mut oqarpoq nangillunilu:
– Naggataatigut imminnut upperinerulerput, taamaattumillu uagut pinnata taakkua ajugaapput. Periarfissaqarsimagaluarpugut. Unamminerup immikkoortuata aappaa naajartulersoq marlunnik siuarsimavugut immaqalu iluatsitsunerulaarsimasuugutta unammineq matusimassagaluarparput Sønderjyskeli siuarpoq uagullu angummanniartussanngorlugit. Sønderjyske Skansen Arenami unamminermini kingullerni qulini tamani ajugaasarpoq.
Kalaallit arfinileraarput
Minik Dahl Høegh tallimanik Akutaaneq Kreutzmannilu ataatsimik isertitsipput.