Folketingi
Socialdemokraatit isornartorsiuinerat Aleqap akerlilerpaa
Annerpaamik sunniuteqarniarluni inissisimaffik atorluarsimallugu, attaviitsoq Aleqa Hammond isumaqarpoq
Socialdemokraatit gruppimi siulittaasuata Henrik Sass Larsenip ullumi isornartorsiuinera tunngavissaqanngitsoq, Aleqa Hammond isumaqarpoq.
Venstremik isumaqatigiissusiornermigit qinersisartuni ilaginnarai, Sass Larsen isumaqarpoq.
Atuaruk: Socialdemokraatit: Aleqa imminut tuniniarpoq
Annerpaamik sunniuteqarniarluni
Aleqa Hammond killormoortuanik isumaqarpoq.
- Venstrekkunni isumaqatigiissuteqarpunga ilisimaaralugu taasisinnaanera tamarmik pisariaqartikkaat.
- Atorluarpara inissisimaffik sunniuteqarnissarlu annerpaaq angujumallugu, isornartorsiuineq pillugu taama qisuariaateqarluni allappoq.
Atuaruk: Aleqa Hammond Nunarput pillugu ataatsimiititaliami siulittaasunngorpoq
Løkke nammineq uppitissagaat
Aleqa Hammondip tusagassiuutini annerusumik Nunarput pillugu ataatsimiititaliamit siulittaasuunermigut saqqumilaarneruniarluni, ministeriuneq uppisinniarnagu neriorsuisimasoq, Socialdemokraatit gruppimi siulittaasuat isumaqarpoq.
Danskit partiivisa ministeriunertik uppisinniarsarilerpassuk namminneq taamaasiorsinnaapput, uangali nunatta sunniuteqarfissaa annerpaaq anguniarlugu assoroorpunga uppisitsiniaajartorlunga sulinngilanga, attaviitsoq tamanna pillugu oqarpoq.
Socialdemokraatit maanna Siumut qaninnerusumik suleqatigilerniarlugu ujartuiniarlutik oqaatigaat, taamaalillutik partii suleqatigisartik Folketingimi sinniisuuffiginiarlugu.
Kim nersualaarisoq
Aleqa Hammondip taamatut iliuuseqarneranut Siumut maanna nersualaarinnippoq.
- Nunarput pillugu ataatsimiititaliami Aleqa Hammond siulittaasunngornera tulluarpoq, partiimi siulittaasoq Kim Kielsen tallimanngormat tusagassiortunik katersortitsinermi oqarpoq.
Tupinnanngitsumillu pineqartoq taamatut naliliinermut isumaqataavoq.
- Nunatta siulittaasuuffik annaasani utertippaa, Nunatsinnut nuannaarutissaavoq, Aleqa Hammond naqissusiivoq.