Socialdemokraatit: Aleqa imminut tuniniarpoq

Aleqa Hammondip aalajangiinera kingulleq Socialdemokraatit siulittaasuata Henrik Sass Larsenip narrutsaatigaa. Kalaallit Nunaannit attaviitsutut folketingimi ilaasortaq socialdemokraatit pingaartitaanut sumiginnaasutut partiip Kalaallit Nunaannut tunngasunut oqaaseqartartua Karin Gaardsted peqatigalugu imminiiginnaasutut unnerluutigaat.

- Socialdemokraatit pingaartitai sulissutiginagit kalaallinullu qinersisartunut tatiginnittunut ataqqinnissuseqarani Kalaallit Nunaannut tunngasunut ataatsimiititaliami siulittaasunngorniassagami talerperlernut pituttorsimalerpoq. Taanna talerperlernit tigummineqaraluartoq, tusagassiuutinut nalunaarummi allapput.

Atuaruk: Aleqa Hammond Nunarput pillugu ataatsimiititaliami siulittaasunngorpoq

Løkke uppisikkusunngilaa

Aleqa Hammondip Lars Løkke Rasmussenillu Kalaallit Nunaannut tunngasunut ataatsimiitaliami siulittaasunngussasoq sapaatip akunnerata siuliani isumaqatigiissutigaat. Siulittaasunngussagunili danskit naalakkersuisuinut taasinikkut ikinnerussuteqalersitsisinnaasunut akerliulluni taasisassanngitsoq isumaqatigiissutigineqarluni.

Socialdemokraatit Siumumit suleqateqarnertik pissutigalugu Kalaallit Nunaannut tunngasunut suleqataasarsimanertik naqissuserpaat. Suliat soorlu puisit amiinut tunngassuteqartut, kalaallinullu Danmarkimi najugaqartunut inuuniarnermi ajornartorsiutilinnut suliniutaasarsimasut.

- Socialdemokraatit partiiat socialdemokraatillu pingaartitaanit politikkillit suleqatigiilluarnikkut ikioqatigiinnerat takorusunneruarput.

- Kalaallillu soqutigisaannut tunngasunut Folketingimi suliaqarnermi akornutaarusunngilagut, naqissusiipput.

Atornerluereernermini issiavimminiiginnarpoq

Augustimi folketingimi ilaasortap aningaasanik piginngisamik atuereernerata kingunerani Kalaallit Nunaannut tunngasunut ataatsimiititaliami siulittaasup tulliatut inissisimatiinnarneqarnera naak Siumumut tunuaqquneqaraluarluni socialdemokraatit aamma narrassutigaat.

- Pakatsissutigeqaarput. Siulittaasup tulliatut ingerlaannannginnermigut Kalaallit Nunaallu pillugu sulinermini Socialdemokraatinit partiinillu saamerlernit allanit tapersersorneqarunnaarnermigut, tapersersortissaqarani ataatsimiititaliami siulittaasutut imminut taagorniaannarluni Aleqa Hammondip pingaartitani tunulliuppai.

- Aleqa Hammond tusagassiuutitigut nuimanissani suleqatigiinnikkut angusaqarnissamit pingaartinnerugai inerniliutigiinnarsinnaavarput. Tamannalu ajuusaarutigaarput, kalaallillu qinersisartut ataqqineqarnerusariaqaraluarlutik.

Henrik Sass Larsen Karin Gaardstedillu Siumut qaninnerusumik suleqatiseriumallugu ujartuipput.