ikiuineq
Snescooterinik ajutoornerup alianartup ilinniarnertuunngorniarfik sunnerpaa
Nukappiaraq 18-inik ukiulik arfininngormat snescooterinik ajutoorluni ajunaartoq, ilinniarnertuunngorniaqatini 16-init peqatigalugit paarlaaqatigiillutik Sisimiuniipput. Ilinniarnertuunngorniat Kalundborgimeersut pisoq alianartoq pillugu ataasinngornermi ullaakkut Danmarkimut aallareerput.
Arfininngornermi ualikkut ajutoorneq pimmat, erngertumik ajornartoornermi upalungaarsimasunik pilersitsisoqarpoq, taakku danskit kalaallillu atuartut kiisalu ajutoornermi kajumissutsimik ikiuuttut ikiorpaat.
Tarnikkut ikiueqqaarneq
Tarnip pissusaanik ilisimasallit aammalu tarnikkut ikiueqqaarnermik misilittagaqartut Sisimiuni ilaqutariinnut sullissivimmi ikiuipput.
Ilinniarnertuunngorniarfimmi rektori Poul V.B. Jensen KTI/GUX Sisimiuneersoq Sermitsiaq.AG-mut ilisimatitsivoq, pisumi taama alianartigisumik peqataanikuunani, soorunalimi aamma atuartut danskit kalaallillu atuartut paarlaaqatigisaat sunnerneqarsimasut.
- Ilinniarnertuunngorniartut ukiaq Allikelund Gymnasiumimi Kalundborgimiipput, maannakkullu atuartut pitsaasumik ilikkagaqarfiusumillu misigisaqartittussanngorpagut, Poul V.B. Jensen oqaluttuarpoq.
Air Greenland nersualaarneqartoq
Kalundborgimi atuartut sisamanngorpat aatsaat angerlartussaagaluarput, kisianni ataasinngornermi ullaakkut angerlartinneqarnissaat iluatsinneqarpoq.
- Air Greenland nersualaartariaqarpara, atuaqatigiit ataatsimut Kangerlussualiariarlutik Københavnimut ataasinngornermi ullumikkut ingerlaqqissinnaaniassammata timmisartumik saniatigut ilanngussimat, ilinniarnertuunngorniarfimmi rektori oqarpoq.
Atuaruk: Qamuteralannik ajutoortoq toquvoq
Atuaqatigiit sapaatip ingerlanerani ajutoorneq pissutigalugu Kalaallit Nunaanniissinnaajunnaarlutik aalajangertut taanna ilisimatitsivoq, tamannalu taakkununnga tarnikkut annertuumik sunniuteqarpoq.
Ataatsimut inuulluaqqusineq
Kalaallit ilinniarnertuunngorniartut atuaqatigiit ullaaq ataatsimoorput, tassani ataatsimut atuartut danskit nal. 9.55 aallartut inuulluaqquaat.
- Nalunaaqutaq 12.00 ilinniarnertuunngorniarfimmi minutsi ataaseq nipaallisimavugut. Tassani ajutoorneq malunnartinniarneqarpoq, kisianni aamma arlaatigut ingerlaqqinniassagatta naggaserlugu, Poul V.B. Jensen oqaluttuarpoq.
Paarlaasseqatigiilluni suliniut Nordplusip ataaniippoq Poul V.B. Jensenilu naapertorlugu atuartut paarlaasseqatigiittarnerat nalitoorujussuuvoq.