SMS-ikkut MIO-p siunnersuisarfiata siunissaa nalorninartoq

Meeqqat pisinnaatitaaffii pillugit suliniaqatigiiffiup MIO-p SMS-ikkut siunnersuisarfia siunissamut nalorninartorsiorpoq.

Meeqqat pisinnaatitaaffiinut sulliveqarfiup MIO-p aningaasanut inatsisitigut tapiissutisiarisartagai siunnersuisarfiup ingerlannerata akilersornissaanut naammanngillat, taamaattumik ukiut tamaasa aningaasaateqarfinnut allanillu tapiissuteqarsinnaasunut MIO tapiiffigeqqulluni qinnuteqartarpoq, meeqqat illersuisuat Aviâja Egede Lynge ilisimatitsivoq.

Atuaruk: Meeqqanut inuusuttunullu Sms-ikkut siunnersuivittaarpoq

Atornerluineq
- Assigiinngitsorpassuarnik peqquteqarlutik meeqqat saaffiginnittarput. Ilaqutariit iluini ajornartorsiortoqarsinnaavoq, kinguaassiutitigut atornerluisimasoqarsimasinnaalluni, qinngasaarisoqarsimalluni imaluunniit imminorusulluni eqqarsaasersortoqarsimasinnaalluni. SMS-ikkut siunnersorneqarnissamik pisariaqartitsineq annertoorujussuusoq paasinarsisimavoq, taassumalu ingerlannissaanut ikiorneqarnissarput pisariaqartipparput, meeqqat oqaaseqartartuat Aviâja Egede Lynge oqarpoq.

Inersimasumik oqaloqatissaqarneq
SMS 1899–ikkut MIO-p siunnersuisarfia oktobarip aallaqqaataani 2013-mi ammarneqarpoq. Meeqqanut inuusuttunullu misigisapiloqarsimaninermikkut ajornartorsiornerminnut ikiortariaqalersimasunut inersimasumilluunniit oqaloqatiginnittariaqalersimasunut siunnersuisarfik atuuppoq.

Ukiut marluk kingulliit ingerlanerini SMS 1899 meeqqanit inuusuttunillu 2000-init amerlanerusunit, Nunatsinnit tamarmeersunit attavigineqarsimavoq.

Amerlanerit inuusuttuaqqat
Meeqqat SMS-ikkut siunnersorneqartarnermik atuisartut arfinilinniit qummut ukioqarput. Saaffiginnittullu amerlanersaat 14-17-llu akornannit ukioqartuneersuupput. SMS 1899-imut saaffiginnittartut amerlaqisut suiaassusertik nalunaarutigineq ajorpaat.

Siunnersuisarfik SMS 1899 ulluinnaat tamaasa ammasarpoq naunaaqutaq 16-18 akornanni.

MIO-p sms-ikkut siunersuisarnera aallartilluarpoq